Sumqayıt şəhərinin mərkəzi küçələrindən biri olan Azərbaycan prospektində fəaliyyət göstərən “Coffeelier” kofeteriyası piyadaların hərəkət yolunu zəbt edib.
Sakinlərin bildirdiyinə görə, iaşə obyektinin önündə düzülən masa və stullar piyada səkisini tutub. Bu isə ərazidə yaşayan insanların və ümumiyyətlə, piyadaların sərbəst hərəkətinə ciddi şəkildə mane olur.
Piyadalar üçün nəzərdə tutulmuş səkiyə masa-stul düzülməsi, Azərbaycan Respublikasının qanunvericiliyinə görə, ictimai yolda maneə yaratmaq və inzibati xəta hesab olunur. Lakin görünən odur ki, kafe rəhbərliyi bu qaydalara məhəl qoymur və ictimai məkanı şəxsi kommersiya maraqları üçün zəbt etməkdə davam edir.
“Gecə saatlarında da vəziyyət daha da pisləşir. Müştərilərin səs-küyü, yüksək səslə musiqi yayımı və sıxlıq ərazidə yaşayanlar üçün əlavə narahatlığa səbəb olur,” – deyə ərazidə yaşayan sakin qeyd edib.
Ərazidə yaşayan sakinlər aidiyyəti qurumlardan – xüsusən də Sumqayıt Şəhər İcra Hakimiyyəti və Daxili İşlər Nazirliyinin yerli strukturlarından məsələ ilə bağlı tədbir görülməsini tələb edir. Onlar restoranın fəaliyyətində ictimai qaydalara və vətəndaşların sərbəst hərəkət hüququna hörmətlə yanaşılmasını istəyirlər. //Xeberle.com