Müşahidələr göstərir ki, vətəndaşlar həmin nəqliyyat vasitələrindən "Ford, “Chevrolet”, “Mercedes”, "KİA", “Hyundai” və "Toyota” kimi markalara daha çox meyl edirlər.
Bununla belə, son vaxtlar Almaniya, Cənubi Koreya və Yaponiyaya məxsus markalar əksər hallarda öz ölkəsindən deyil, daha çox okeanın o tayından - ABŞ-dan gətirilir. Nəticədə 2-ci əl avtomobil bazarında "Amerikanka"ların payı xeyli artıb.
Yeni qəbul olunmuş qərara əsasən, gələn ildən etibarən istehsal ili 2014-cü ildən əvvəl olan avtomobillərin ölkəyə girişi qadağan olunacaq. İlin sonuna sadəcə bir il qaldığını nəzərə alaraq qərar qəbul olunmamışdan əvvəl xərici ölkələrdən avtomobil sifariş etmiş vətəndaşların aqibəti isə hər kəsə maraqlıdır.
Məsələ ilə bağlı nəqliyyat məsələləri üzrə ekspert Rövşən Həsənov Referans.az-a açıqlamasında bildirib ki, yeni ilə bir ay qalmasına baxmayaraq, hətta dekabr ayında sifariş olunan avtomobillər belə maneəsiz şəkildə sahiblərinə çatdırılacaq.
"Ötən il də biz bu halla rastlaşdıq. Sifarişçi Gömrük Komitəsinə avtomobili sifariş etdiyi tarixi göstərdiyi anda düşünürəm ki, artıq ciddi bir problem yaşanmayacaq. 2023-cü ilin son ayında belə sifariş edilibsə, ödənişi həyata keçirilibsə bu avtomobil ölkəyə gələcək. Çünki hər kəsə məlumdur ki, xarici ölkələrdən sifariş verilmiş avtomobillərin Azərbaycana gəlib çıxması 2-3 ay müddət tələb edir. Buna görə də artıq sifariş verilibsə vətəndaş heç bir maneə ilə qarşılaşmayacaq. Təbii ki, vətəndaşlara bu haqda daha tez məlumat verilsə idi daha yaxşı olardı. Lakin bu kimi hallarda maneələr minimuma endirilir, vətəndaş düşünülür".