Bu gün Dövlət İmtahan Mərkəzi (DİM) tərəfindən I və IV ixtisas qrupları üzrə ali təhsil müəssisələrinə qəbul imtahanının ikinci cəhdi keçirilir. Eyni zamanda III ixtisas qrupunun DT və TC altqruplarını seçən abituriyentlər üçün coğrafiya fənni üzrə ikinci cəhd imtahanı da təşkil olunur.

Sumqayit.tv xəbər verir ki, imtahanlar Bakı, Sumqayıt, Abşeron, Xankəndi, Naxçıvan, Gəncə və ölkənin digər şəhər və rayonlarında keçirilir.

İmtahan saat 10:00-da başlayıb. Saat 09:45-dən sonra imtahan binasına gələn iştirakçılar buraxılmayıblar. Abituriyentlərə buraxılış vərəqəsində göstərilən vaxtda imtahan binasına gəlmək tövsiyə olunub.

İştirakçılar imtahana buraxılış vərəqəsi və şəxsiyyəti təsdiq edən sənədin əslini təqdim etməlidirlər. Şəxsiyyət vəsiqəsində fotoşəkli olmayan iştirakçılar isə təhsil müəssisəsi tərəfindən verilmiş fotoşəkilli və möhürlə təsdiqlənmiş arayışı da özləri ilə gətirməlidirlər.

DİM-in məlumatına görə, imtahanların təşkili üçün ölkə üzrə 153 imtahan binası, 2 658 imtahan zalı ayrılıb. İmtahan prosesinə 153 ümumi imtahan rəhbəri, 429 imtahan rəhbəri, 3 304 nəzarətçi, 482 buraxılış rejimi əməkdaşı və 153 bina nümayəndəsi cəlb olunub.

Bugünkü imtahanlarda ümumilikdə 36 356 abituriyentin iştirakı nəzərdə tutulur. Onlardan 24 997 nəfəri I ixtisas qrupu, 5 302 nəfəri IV ixtisas qrupu, 6 057 nəfəri isə III ixtisas qrupunun DT və TC altqrupları üzrə coğrafiya imtahanında iştirak edir.

Bundan əlavə, 65 nəfər sağlamlıq imkanları məhdud abituriyent üçün xüsusi şərait yaradılıb, onların rahat şəkildə imtahan verməsi məqsədilə xüsusi zallar və fərdi nəzarətçilər ayrılıb.

12-07-2026, 09:30 57