Bu gün Dövlət İmtahan Mərkəzi (DİM) tərəfindən I və IV ixtisas qrupları, eləcə də III ixtisas qrupu üzrə DT və TC altqruplarının hər ikisini seçən abituriyentlər üçün coğrafiya fənni üzrə qəbul imtahanı keçirilib.

Sumqayit.tv xəbər verir ki, imtahanlar Bakı, Sumqayıt, Abşeron, Xankəndi, Naxçıvan, Gəncə və digər şəhər və rayonlarda təşkil olunub.

DİM-in məlumatına görə, imtahan prosesinin idarə olunması üçün operativ qərargah fəaliyyət göstərib və bütün imtahan binalarında proses təlimata uyğun şəkildə keçirilib.

İlkin nəticələrə əsasən, 12 nəfərdə mobil telefon aşkar edilib və onlar imtahandan kənarlaşdırılıblar. Qayda pozuntusuna yol verən həmin abituriyentlərin müsabiqə nəticələri ləğv olunacaq və onlar ali və orta ixtisas təhsili müəssisələrinə qəbul müsabiqəsində iştirak edə bilməyəcəklər.

Qeyd edək ki, bugünkü imtahanda ümumilikdə 36 356 abituriyentin iştirakı nəzərdə tutulurdu. Həmçinin 65 nəfər sağlamlıq imkanları məhdud abituriyent üçün xüsusi şərait yaradılıb.

DİM bildirib ki, iyulun 13-dən etibarən imtahan materiallarının emalına başlanılacaq. Açıq tipli tapşırıqların yoxlanılması vaxt tələb etdiyindən nəticələrin təxminən iki həftə sonra elan olunması planlaşdırılır. 

Bu gün, 14:49 9