Abşeron rayonunun Saray qəsəbəsində anasını qətlə yetirməyə cəhd etməkdə təqsirləndirilən şəxs barəsində məhkəmə hökmü çıxarılıb.

Sumqayit.tv Teleqrafi.az-a istinadən xəbər verir ki, hadisə Sumqayıt şəhər sakini, 2001-ci il təvəllüdlü Ayazın (ad şərtidir) anası Könülə (ad şərtidir) yaşadığı evdə çoxsaylı bıçaq zərbələri endirməsi ilə baş verib.

İstintaq materiallarına əsasən, qadın hadisədən təxminən bir il əvvəl ailədaxili problemlər səbəbindən həyat yoldaşı və övladlarından ayrılaraq Saray qəsəbəsində atasından miras qalan evdə tək yaşamağa başlayıb. Zərərçəkmiş ifadəsində həyat yoldaşı və iki oğlunun narkotik vasitələrdən istifadə etdiyini, onların təzyiq və təhqirlərinə tab gətirə bilmədiyi üçün evi tərk etdiyini bildirib.

Təqsirləndirilən şəxs isə ifadəsində anasının ailədən uzaqlaşmasını qəbul edə bilmədiyini, onun başqa həyat seçdiyini düşündüyünü və bu səbəbdən qisas almaq qərarına gəldiyini deyib. Hadisə günü anasının evinə gedən Ayaz əvvəlcə onunla mübahisə edib, daha sonra mətbəxdən götürdüyü bıçaqla qadına hücum edib.

Məhkəmə materiallarına görə, qadına bədəninin müxtəlif nahiyələrindən ümumilikdə 13 bıçaq zərbəsi endirilib. Yaralı qadın oğlunun əlindən qaçaraq küçəyə çıxıb və ətrafdakı insanlardan kömək istəyib. Ona vaxtında tibbi yardım göstərildiyi üçün həyatı xilas olunub.

İş üzrə dindirilən zərərçəkmiş ailədə uzun müddət davam edən narkotik asılılığı, zorakılıq və maddi çətinliklərdən danışaraq, yaşadığı ağır şəraitə görə evdən ayrıldığını bildirib.

Ayaz barəsində Cinayət Məcəlləsinin 29, 120.1-ci (qəsdən adam öldürməyə cəhd) maddəsi ilə ittiham irəli sürülüb. O, məhkəmədə özünü qismən təqsirli bilsə də, anasını öldürmək niyyətində olmadığını iddia edib.

Cinayət işinə Sumqayıt Ağır Cinayətlər Məhkəməsində baxılıb. Məhkəmənin hökmü ilə Ayaz 7 il 10 ay 15 gün müddətinə azadlıqdan məhrum edilib.

9-07-2026, 18:32 98