Xırdalan bələdiyyəsinin keçmiş sədri Orxan Musayevin qanunsuz əməlləri ilə bağlı başlanmış cinayət işinin istintaqı yekunlaşıb və iş məhkəməyə göndərilib.

Sumqayit.tv xəbər verir ki, bu barədə Baş Prokurorluğun Mətbuat Xidməti məlumat yayıb.

Məlumata görə, Ədliyyə Nazirliyinin Bələdiyyələrlə İş Baş İdarəsindən daxil olmuş materiallar əsasında Baş prokuror yanında Korrupsiyaya qarşı Mübarizə Baş İdarəsində aparılan istintaq zamanı Orxan Musayevin 2020-2025-ci illərdə Abşeron rayonu Xırdalan bələdiyyəsinin sədri vəzifəsində işlədiyi dövrdə qanunsuz əməllərə yol verdiyi müəyyən olunub.

İstintaqla onun vəzifə səlahiyyətlərindən sui-istifadə edərək Xırdalan bələdiyyəsinə məxsus 1,92 hektar torpaq sahəsini 75 nəfərə qanunvericiliklə müəyyən edilmiş qiymətdən aşağı qiymətə satdığı və bunun nəticəsində 600 min manatdan artıq ziyan vurduğu bildirilib.

Bundan başqa, istintaq zamanı Orxan Musayevin qulluq mövqeyindən istifadə etməklə külli miqdarda bələdiyyə əmlakını mənimsəmə və israf etmə yolu ilə talaması, eləcə də tamah niyyəti ilə rəsmi sənədlərə bilə-bilə yalan məlumatlar daxil etməklə vəzifə saxtakarlığı törətməsinə dair faktların da aşkar edildiyi qeyd olunub.

Toplanmış sübutlar əsasında Orxan Musayevə Cinayət Məcəlləsinin 179.3.2 (külli miqdarda mənimsəmə), 308.2 (ağır nəticələrə səbəb olan vəzifə səlahiyyətlərindən sui-istifadə) və 313-cü (vəzifə saxtakarlığı) maddələri ilə ittiham elan olunub. Onun barəsində polisin nəzarəti altına vermə qətimkan tədbiri seçilib.

Cinayət işi baxılması üçün Sumqayıt Ağır Cinayətlər Məhkəməsinə göndərilib.

9-07-2026, 15:32 44