Sumqayıt şəhərində sakinlərlə birbaşa ünsiyyətin gücləndirilməsi, onların müraciətlərinin yerində araşdırılması və qaldırılan məsələlərin operativ həlli məqsədilə növbəti səyyar qəbul təşkil olunub.
Sumqayit.tv xəbər verir ki, görüşdə çıxış edən Sumqayıt Şəhər İcra Hakimiyyəti başçısının birinci müavini Teymur Səmədov bildirib ki, şəhərdə son illər həyata keçirilən abadlıq və yenidənqurma layihələri Sumqayıtın inkişafına mühüm töhfə verib. Onun sözlərinə görə, şəhər rəhbərliyinin tapşırıqlarına uyğun olaraq məhəllələrin abadlaşdırılması, yolların və səkilərin yenilənməsi, park və istirahət məkanlarının salınması, eləcə də yaşıllıq sahələrinin genişləndirilməsi istiqamətində işlər davam etdirilir.
Teymur Səmədov qeyd edib ki, həyata keçirilən layihələrin əsas məqsədi sakinlərin rahatlığını təmin etmək, uşaqların təhlükəsiz istirahəti və şəhər mühitinin daha da yaxşılaşdırılmasıdır.
Daha sonra çıxış edən Sumqayıt Şəhər İcra Hakimiyyəti başçısının müavini Fərid Ələkbərov bildirib ki, şəhərin inkişafı ilə bağlı həyata keçirilən tədbirlər sakinlərin müraciət və təklifləri nəzərə alınmaqla icra edilir. O vurğulayıb ki, hər bir müraciət aidiyyəti qurumlarla birgə araşdırılır və həlli istiqamətində zəruri addımlar atılır.
Tədbirdə çıxış edən Sumqayıt Şəhər Ağsaqqallar Şurasının sədri Eldar İsmayılov isə ağsaqqalların cəmiyyət həyatındakı rolundan danışaraq, sakinlərlə daim əlaqə saxladıqlarını və onların sosial məsələlərinin həllinə dəstək verdiklərini bildirib.
Görüş zamanı sakinlər şəhərdə həyata keçirilən abadlıq və quruculuq işlərini yüksək qiymətləndirdiklərini bildiriblər. Eyni zamanda, yaşadıqları ərazilərdə mövcud olan bəzi kommunal və sosial problemləri də səsləndiriblər.
Qaldırılan məsələlərin bir hissəsinin yerində araşdırılaraq həll edildiyi, digər müraciətlərin isə aidiyyəti qurumlara yönləndirilərək nəzarətə götürüldüyü bildirilib.
9-07-2026, 19:38
40
