İyulun 8-də Heydər Əliyev Sarayında keçirilən "SABAH-ın Məzunu 2026" tədbiri Sumqayıt Dövlət Universiteti (SDU) üçün əlamətdar hadisə ilə yadda qalıb.

Sumqayit.tv xəbər verir ki, bu il ilk dəfə olaraq Sumqayıt Dövlət Universitetində təhsil alan SABAH qruplarının tələbələri ali təhsillərini başa vuraraq məzun adını qazanıblar.

Tədbirdə elm və təhsil naziri Emin Əmrullayev, dövlət rəsmiləri, ali təhsil müəssisələrinin rektorları, SABAH qruplarının məzunları və digər qonaqlar iştirak ediblər.

Mərasimdə Sumqayıt Dövlət Universitetinin rektoru, texnika elmləri doktoru, professor Nurəli Yusifbəyli universitetin ilk SABAH məzunlarına diplomlarını təqdim edib. Rektor məzunları bu tarixi nailiyyət münasibətilə təbrik edərək, onlara gələcək fəaliyyətlərində uğurlar arzulayıb və xatirə şəkilləri çəkdirib.

Nurəli Yusifbəyli sosial şəbəkə hesabında paylaşdığı təbrik mesajında bu hadisənin universitet üçün xüsusi əhəmiyyət daşıdığını vurğulayıb. O bildirib ki, ilk SABAH məzunları yalnız ali təhsillərini uğurla başa vuran gənclər deyil, eyni zamanda SDU-da SABAH təhsil modelinin ilk nümayəndələri kimi universitetin tarixinə öz adlarını yazdırıblar.

Qeyd edək ki, Sumqayıt Dövlət Universitetində ilk SABAH məzunlarının yetişməsi ali təhsil müəssisəsində tədris keyfiyyətinin yüksəldilməsi istiqamətində görülən işlərin mühüm nəticəsi hesab olunur. Bu uğur universitetin inkişafında yeni mərhələnin başlanğıcı olmaqla yanaşı, gələcək SABAH tələbələri üçün də motivasiya mənbəyi kimi qiymətləndirilir.

11-07-2026, 12:35 56