Milli Məclis kibertəhlükəsizlik, toxumçuluq və xarici valyuta əməliyyatları ilə bağlı qanunvericiliyə təklif edilən dəyişiklikləri ilk oxunuşda qəbul edib.

Sumqayit.tv xəbər verir ki, İnzibati Xətalar Məcəlləsinə təklif olunan dəyişikliklərə əsasən, kibertəhlükəsizlik sahəsində normativ tələblərin pozulmasına görə yeni cərimələr tətbiq olunacaq.

Layihəyə əsasən, informasiya infrastrukturunun kibertəhlükəsizliyinin təmin edilməməsi, kiberinsidentlər barədə məlumatların vaxtında təqdim olunmaması, aidiyyəti qurumların sorğularının cavablandırılmaması və digər pozuntulara görə vəzifəli şəxslər 500 manatdan 1000 manatadək, hüquqi şəxslər isə 1000 manatdan 2000 manatadək cərimələnəcək.

Bundan başqa, kompüter insidentlərinə qarşı mübarizə mərkəzlərinin və təhlükəsizlik əməliyyatları mərkəzlərinin müvafiq reyestrə daxil edilmədən fəaliyyət göstərməsinə görə də cərimələr nəzərdə tutulur. Bu halda vəzifəli şəxslər 1000–1500 manat, hüquqi şəxslər isə 1500–2500 manat məbləğində cərimə ediləcək.

Dəyişikliklər toxumçuluq sahəsini də əhatə edir. Qanunvericiliyin tələblərinə uyğun olmayan toxumların istehsalı, satışı, idxalı, ixracı, həmçinin qeydiyyatsız fəaliyyət və saxta məlumatların təqdim olunmasına görə fiziki, vəzifəli və hüquqi şəxslər üçün yeni cərimələr müəyyənləşdirilir.

Layihədə xarici iqtisadi fəaliyyət nəticəsində əldə olunan və ölkəyə qaytarılması məcburi olan xarici valyuta vəsaitlərinin geri gətirilməməsinə görə tətbiq edilən cərimələrin də dəyişdirilməsi təklif olunur. Eyni zamanda, məhkəmə və ya səlahiyyətli orqan qərar qəbul etməzdən əvvəl həmin vəsait ölkəyə qaytarılarsa, inzibati məsuliyyətdən azadetmə nəzərdə tutulur.

Müzakirələrdən sonra qanun layihəsi Milli Məclisdə ilk oxunuşda qəbul edilib.

Bu gün, 13:49 10