İyulun 12-də Dövlət İmtahan Mərkəzi (DİM) tərəfindən I və IV ixtisas qrupları üzrə ali təhsil müəssisələrinə qəbul imtahanı keçiriləcək. Həmin gün III ixtisas qrupunun həm DT, həm də TC altqruplarını seçən abituriyentlər üçün coğrafiya fənni üzrə də imtahan təşkil olunacaq.

Sumqayit.tv xəbər verir ki, imtahanlar Bakı, Xankəndi, Naxçıvan, Gəncə, Şəmkir, Ağstafa, Qazax, Sumqayıt, Abşeron, Şamaxı, Mingəçevir, Şəki, Zaqatala, Bərdə, Göyçay, Ucar, Kürdəmir, Şirvan, Sabirabad, Salyan, Lənkəran, Cəlilabad, Quba və Xaçmaz şəhər və rayonlarında keçiriləcək.

Abituriyentlər iyulun 2-dən etibarən DİM-in rəsmi saytından "İmtahana buraxılış vərəqəsi"ni çap edə bilirlər. Buraxılış vərəqəsində imtahanın keçiriləcəyi bina, zal, başlanma vaxtı və iştirakçının imtahan binasına gəlməli olduğu saat göstərilib.

DİM bir daha xatırladıb ki, imtahan saat 10:00-da başlayacaq. Buraxılış rejimi isə saat 09:45-də başa çatacaq və bu vaxtdan sonra gələn iştirakçılar imtahan binasına buraxılmayacaqlar.

Abituriyentlər imtahana buraxılış vərəqəsi və şəxsiyyəti təsdiq edən sənədin əslini təqdim etməlidirlər. Şəxsiyyət vəsiqəsində fotoşəkli olmayan iştirakçılar isə əlavə olaraq təhsil müəssisəsi tərəfindən verilmiş fotoşəkilli və möhürlə təsdiqlənmiş arayış gətirməlidirlər.

Məlumata görə, imtahanların təşkili üçün ölkə üzrə 153 imtahan binası və 2658 imtahan zalı ayrılıb. Prosesə minlərlə nəzarətçi və təşkilatçı cəlb olunub.

İmtahanda I ixtisas qrupu üzrə 24 997, IV ixtisas qrupu üzrə 5302, III ixtisas qrupunda hər iki altqrupu seçənlər üçün coğrafiya imtahanında isə 6057 nəfər olmaqla, ümumilikdə 36 356 abituriyentin iştirakı nəzərdə tutulur.

Bundan əlavə, 65 sağlamlıq imkanları məhdud abituriyent üçün xüsusi şərait yaradılıb. Görmə və hərəkət məhdudiyyətli iştirakçıların rahat imtahan verməsi üçün müvafiq tədbirlər görülüb.

DİM bildirib ki, hazırda bütün imtahan mərkəzlərində hazırlıq işləri davam etdirilir. Təhlükəsizliyin təmin olunması məqsədilə iyulun 11-də imtahan binalarına yekun baxış keçiriləcək və zallar Daxili İşlər Nazirliyinin Baş Mühafizə İdarəsinin əməkdaşlarının mühafizəsinə veriləcək.

8-07-2026, 15:59 120