Baku TV-nin hazırladığı reportajda Sumqayıt şəhərinin 8-ci mikrorayonunda yerləşən yaşayış binasında mənzil alan sakinlərin uzun müddətdir üzləşdikləri problemlər gündəmə gətirilib.

Sumqayit.tv xəbər verir ki, Koroğlu küçəsində yerləşən binada mənzil alan 90-dan çox ailənin sözlərinə görə, yaşayış binası tikinti şirkəti tərəfindən tam başa çatdırılmadan təhvil verilib.

Sakinlər bildirirlər ki, binada hələ də lift və qaz xətləri istifadəyə verilməyib, dam örtüyü isə quraşdırılmayıb. Onların sözlərinə görə, mövcud vəziyyət həm yaşayış üçün ciddi çətinlik yaradır, həm də təhlükəsizlik baxımından narahatlıq doğurur.

Baku TV-yə danışan sakinlərdən biri bildirib ki, binadakı açıq pilləkənlər azyaşlı uşaqlar üçün təhlükə yaradır:

"Beş və səkkiz yaşlarında iki nəvəm var. Biri məktəbə, digəri bağçaya gedir. Pilləkənlərin kənarları açıq olduğu üçün onlar sərbəst hərəkət edə bilmirlər. Bir hadisə baş versə, kim cavab verəcək?"

Məsələ ilə bağlı Sumqayıt Şəhər İcra Hakimiyyətindən bildirilib ki, sakinlərin müraciətləri nəzarətə götürülüb. Qurumun məlumatına görə, problemin həlli məqsədilə MTK rəhbərliyi ilə görüş keçirilib və vətəndaşların qaldırdığı məsələlərin aradan qaldırılması istiqamətində zəruri tapşırıqlar verilib.

Bu gün, 10:50 9