Sumqayıt şəhərinin Qurd Dərəsi bağları ərazisində yerləşən 4-cü dayanacaq yaxınlığındakı boş sahə ilə bağlı redaksiyamıza sakinlərdən müraciət daxil olub.

Sakinlərin Sumqayit.tv-yə bildirdiyinə görə, naməlum şəxslər sözügedən əraziyə məişət və digər tullantılar gətirərək atır, daha sonra isə onları yandırırlar.

Müraciətdə bildirilir ki, ərazidən elektrik xətləri və qaz borusu keçir. Sakinlər bu səbəbdən baş verə biləcək yanğın və ya partlayış təhlükəsindən narahat olduqlarını qeyd edirlər. Onların sözlərinə görə, boş sahənin ətrafı yaşayış evləri ilə əhatə olunduğundan vəziyyət daha da risklidir.

Vətəndaşlar aidiyyəti qurumların əraziyə baxış keçirməsini, tullantıların təmizlənməsini və bu cür halların qarşısının alınması üçün zəruri tədbirlərin görülməsini xahiş edirlər.

Qeyd: Yazıda yer alan iddialar sakinlərin müraciətinə əsaslanır. Sumqayit.tv məsələ ilə bağlı aidiyyəti qurumların mövqeyini dərc etməyə hazırdır.

Bu gün, 12:38 18