İyunun 30-da keçirilən lisey və gimnaziyalara qəbul imtahanının nəticələri açıqlanıb.

Sumqayit.tv xəbər verir ki, bu barədə Azərbaycan Respublikasının Təhsil İnstitutu məlumat yayıb.

Bildirilib ki, imtahan nəticələri artıq iştirakçıların şəxsi kabinetlərinə göndərilib. Lisey və gimnaziyalar üzrə seçim prosesi iyulun 8-də saat 11:00-da başlayıb və iyulun 14-ü saat 12:00-dək davam edəcək.

Namizədlər seçimlərini şəxsi kabinetlərində yerləşən "İmtahanlar" bölməsinin "Lisey seçimi" hissəsi vasitəsilə edə bilərlər. Bu mərhələdə maksimum 3 lisey və ya gimnaziya seçmək mümkündür. Lakin 3 təhsil müəssisəsinin seçilməsi məcburi deyil.

Təhsil İnstitutu şagird və valideynlərə yalnız təhsil almağı planlaşdırdıqları lisey və ya gimnaziyanı seçməyi tövsiyə edir. Qəbul olunan şagirdlər üçün elektron yerdəyişmə sistemi avtomatik aktivləşdiriləcək və müvafiq sorğu yaradılacaq. Sənəd qəbulunun isə avqust ayının ilk yarısında həyata keçirilməsi nəzərdə tutulur.

Qeyd edək ki, qəbul imtahanı ölkə üzrə 41 imtahan mərkəzində təşkil olunub və prosesdə 7 minə yaxın şagird iştirak edib. Təhsil İnstitutunun məlumatına görə, imtahan bütün mərkəzlərdə uğurla keçirilib.

8-07-2026, 12:37 51