Sumqayıt şəhərinin ikinci giriş-çıxış istiqamətində, General Məhəmməd Əsədov küçəsində (Daş bazarı ərazisi) yerləşən piyada keçidində təhlükəsizliklə bağlı problem yaşanır.

Sumqayit.tv-yə daxil olan məlumata görə, sözügedən ərazidə yolun üzərində piyada keçidini göstərən zebra nişanlanması olsa da, sürücüləri əvvəlcədən xəbərdar edən "Piyada keçidi" yol nişanı quraşdırılmayıb.

Bununla yanaşı, yol örtüyündəki zebra xətləri də zamanla silinib və uzaq məsafədən demək olar ki, görünmür. Bu isə xüsusilə axşam saatlarında və əlverişsiz hava şəraitində sürücülərin piyada keçidini vaxtında fərq etməsini çətinləşdirir, nəticədə qəza riskini artırır.

Məlum olduğu kimi, piyada keçidlərində təhlükəsizliyin təmin edilməsi üçün həm yol nişanlanmasının aydın görünməsi, həm də "Piyada keçidi" xəbərdaredici yol nişanının quraşdırılması vacib hesab olunur.

Sakinlər və sürücülər aidiyyəti qurumlardan ərazidə silinmiş zebra xətlərinin yenilənməsini, həmçinin piyada keçidini bildirən yol nişanlarının quraşdırılmasını xahiş edirlər.

Ümid edirik ki, məsələ qısa müddətdə diqqətə alınacaq və piyadaların təhlükəsiz hərəkətinin təmin olunması istiqamətində zəruri tədbirlər görüləcək.

3-08-2026, 10:07 45