Magistratura pilləsinə qəbul olunan bakalavrların ali təhsil müəssisələri üzrə qeydiyyatı 3 avqust saat 15:00-dan 12 avqust saat 18:00-dək my.gov.az portalı üzərindən aparılacaq.

Sumqayit.tv xəbər verir ki, bu barədə Elm və Təhsil Nazirliyi məlumat yayıb.

Bildirilib ki, bakalavrlar qeydiyyat üçün əvvəlcə mygov ID vasitəsilə şəxsi kabinetlərinə daxil olmalı, daha sonra Elm və Təhsil Nazirliyinin "Ali və orta ixtisas təhsil müəssisələrinə təhsilalanların qeydiyyatı" xidmətindən istifadə etməlidirlər.

Qeydiyyat zamanı qəbul olunan şəxslər şəxsi və qəbul məlumatlarını təsdiqləyərək müraciətlərini elektron qaydada göndərə bilərlər. Müraciətin statusunu isə real vaxt rejimində şəxsi kabinet vasitəsilə izləmək mümkündür.

Təhsil müəssisəsi müraciəti yoxlayıb təsdiqlədikdən sonra qeydiyyat prosesi tamamlanmış hesab olunur və bakalavr magistr tələbəsi kimi rəsmiləşdirilir. Bununla bağlı vətəndaşa my.gov.az platforması üzərindən bildiriş göndəriləcək.

3-08-2026, 12:24 48