Dövlət İmtahan Mərkəzinin keçirdiyi qəbul imtahanlarında IV ixtisas qrupu üzrə maksimum nəticə göstərən Sumqayıt şəhəri Təbiət Elmləri Təmayüllü Gimnaziyanın məzunu Samir Tağızadənin atası oğlunun uğur hekayəsindən danışıb.

Sumqayit.tv AzEdu.az-a istinadən xəbər verir ki, 700 bal toplayan Samirin atası, Bakı Dövlət Universitetinin Mexanika-riyaziyyat fakültəsinin müəllimi Hikmət Tağıyev bildirib ki, bu nəticə onlar üçün gözlənilən olsa da, böyük sevinc və qürur hissi yaşadıblar.

Onun sözlərinə görə, Samir uşaqlıqdan həkim olmağı, xüsusilə neyrocərrah kimi fəaliyyət göstərməyi arzulayıb və bu seçim tamamilə öz istəyi olub.

Hikmət Tağıyev qeyd edib ki, oğlu digər beş fənn üzrə müəllim yanında hazırlaşsa da, riyaziyyatdan repetitor yanına getməyib. Bu fənn üzrə hazırlığı evdə planlı şəkildə aparıb və imtahanda maksimum 100 bal toplayıb.

Ata hesab edir ki, uğurun əsas səbəbi mövzuları əzbərləmək deyil, dərindən anlamaq və planlı şəkildə çalışmaqdır. O bildirib ki, ailədə Samirə heç vaxt təzyiq göstərilməyib, dərslə yanaşı istirahətinə də xüsusi diqqət yetirilib.

Hikmət Tağıyev əlavə edib ki, Samir gələcəkdə təhsilini Almaniyada davam etdirmək, rezidenturanı xaricdə oxumaq və daha sonra Azərbaycana qayıdaraq həkim kimi ölkəsinə xidmət etmək istəyir.

Sonda o, abituriyentlərə və valideynlərə səbirli olmağı, zəhmətdən çəkinməməyi və vaxt bölgüsünü düzgün qurmağı tövsiyə edib. 

Bu gün, 14:44 9