Bəzi insanlar ömürlərini sadəcə yaşamırlar, onu xeyirxahlıq, mərhəmət və vətən sevgisi ilə mənalandırırlar. Elə insanlar var ki, onların simasında bir nəslin tərbiyəsini, bir ailənin səadətini və bir ömrün müdrikliyini görürsən. Əmraslanova Temza Müseyib qızı da belə insanlardandır.

80 illik şərəfli ömür yolunu arxada qoyan Temza xanım təkcə övladlarının deyil, onu tanıyan hər kəsin qəlbində dərin izlər buraxmış ziyalı Azərbaycan xanımıdır. Həyat yoldaşı Əliyev Cəlal Əbdülkərim oğlu ilə birlikdə uzun illər Azərbaycan dövlətinə vicdanla və ləyaqətlə xidmət etmiş, halal zəhmətləri ilə nümunəvi bir ömür yaşamışlar.

Allahın bəxş etdiyi bu mənalı ömrün ən böyük sərvəti isə onların qurub-yaratdığı ailə ocağıdır. Bu ocağın istisində böyüyən 4 övlad, 9 nəvə və 2 nəticə bu gün Temza xanımın ömür kitabının ən gözəl səhifələridir. Bu böyük ailə bir ömrün bəhrəsi, bir ananın dualarının, zəhmətinin və sevgisinin təcəssümüdür.

Qərbi Azərbaycan İcmasının Sumqayıt nümayəndəliyinin sədri Ramiz İsmayılov və nümayəndəliyin bir qrup üzvü yubliyarı təbrik etmək üçün onun evində qonaq olmuş, Temza xanıma 80 illik yubileyi münasibətilə üzərində şəkli əks olunan xüsusi xatirə hədiyyəsi və Qərbi Azərbaycan İcmasının Sumqayıt nümayəndəliyi adından icmanın fəaliyyətinə verdiyi dəyərli töhfələrə görə təşəkkürnamə təqdim etmişlər.

İcma üzvlərinin Temza xanıma verdiyi "İpək Nənə" təxəllüsü isə heç də təsadüfi deyil. Çünki ipək necə zərifliyi, saflığı və möhkəmliyi özündə birləşdirirsə, Temza xanım da öz həyatında bu ali keyfiyyətləri yaşatmağı bacarmışdır. Onun mülayim sözü, şəfqətli qəlbi və ağbirçək müdrikliyi onu sevənlərin qəlbində xüsusi yer tutub.

80 yaş sadəcə bir rəqəm deyil. Bu, 80 ilin xatirələri, duaları, zəhməti, sevgisi və qürurudur. Bu ömür yolunda qazanılan ən böyük mükafat isə insanların sevgisi, ailənin ehtiramı və gələcək nəsillərə ötürülən gözəl ad-sanıdır.

Əziz Temza xanım!

Arzu edirik ki, ömür kitabınızın bundan sonrakı səhifələri də sağlamlıq, sevinc və xoş günlərlə yazılsın. Ocağınızdan daim xeyir-bərəkət, könlünüzdən isə təbəssüm əskik olmasın. Allah Sizə cansağlığı, firavan ömür, övladlarınızın, nəvələrinizin və nəticələrinizin uğurlarını görməyi nəsib etsin!

80 illik şərəfli ömrünüz mübarək olsun, İpək Nənə!

Siz hələ uzun illər ailənizin nur saçan çırağı, Qərbi Azərbaycan ruhunun daşıyıcısı və hər kəsin hörmət bəslədiyi müdrik ağbirçəyi olaraq qalasınız!

Yubileyiniz mübarək!

Dərin hörmətlə, QAİ Sumqayıt Nümayəndəliyi

Bu gün, 17:50 13