Dövlət İmtahan Mərkəzi (DİM) 2026/2027-ci tədris ili üçün ali təhsil müəssisələrinin magistratura səviyyəsinə qəbul müsabiqəsinin nəticələrini açıqlayıb.
Sumqayit.tv xəbər verir ki, bu barədə DİM məlumat yayıb.
Bildirilib ki, bakalavrlar imtahanın nəticələrini ixtisaslaşma seçimi ərizəsində göstərilən 7 rəqəmli kodu 7727 nömrəsinə SMS göndərməklə öyrənə bilərlər.
Müsabiqənin nəticələrinə əsasən, ixtisaslaşma seçimində iştirak edən 15 721 bakalavrdan 13 845 nəfər magistraturaya qəbul olunub. Onlardan 6 580 nəfər dövlət sifarişi, 52 nəfər dövlət hesabı, 7 213 nəfər isə ödənişli əsaslarla təhsil alacaq.
Qəbul olunan şəxslər 3 avqust saat 15:00-dan 12 avqust saat 18:00-dək my.gov.az portalı üzərindən elektron qeydiyyatdan keçməlidirlər. Qeydiyyatdan keçməyən şəxslər qəbuldan imtina etmiş hesab olunacaq və onların adları siyahıdan çıxarılacaq.
Qəbul olunanların tam siyahısı sabah günün ikinci yarısında "Magistr" jurnalının 5-ci sayında dərc ediləcək.
29-07-2026, 18:49
54
