Sumqayıtın Kimyaçılar qəsəbəsində yaşayan sakinlər elektrik enerjisinin verilişində yaranan problemlə bağlı narazılıqlarını ifadə edirlər.
Sumqayit.tv-yə video müraciət ünvanlayan sakinlərin sözlərinə görə, son saatlarda elektrik gərginliyində kəskin dəyişikliklər müşahidə olunur. İddialara əsasən, bəzi vaxtlarda gərginlik 350-370 volta qədər yüksəlir, bəzi hallarda isə 110 volta qədər aşağı düşür. Bu isə məişət avadanlıqlarından təhlükəsiz istifadəni çətinləşdirir.
Sakinlər bildirirlər ki, axşam saat 20:00 radələrindən etibarən elektrik avadanlıqlarını normal qaydada işlətmək mümkün olmayıb və problem səhər saatlarında da davam edib.
Müraciətdə, həmçinin qeyd olunur ki, aidiyyəti qurumun qaynar xətti ilə əlaqə saxlamaq cəhdləri nəticəsiz qalıb.
Vətəndaşlar yaranmış problemin qısa müddətdə araşdırılmasını, elektrik enerjisinin stabil şəkildə təmin olunmasını və məsələ ilə bağlı rəsmi açıqlama verilməsini xahiş edirlər.
Qeyd: Xəbərdə yer alan məlumatlar Kimyaçılar qəsəbəsi sakinlərinin Sumqayit.tv-yə ünvanladıqları müraciət və təqdim etdikləri videogörüntülərə əsaslanır. Sumqayit.tv məsələ ilə bağlı aidiyyəti qurumun mövqeyini dərc etməyə hazırdır.
28-07-2026, 13:22
57
