Sumqayıtlı Vətən müharibəsi şəhidi Elvin Novruzovun anası Gülşən Novruzova qızına böyrəyini bağışlayaraq ona donor olub.

Sumqayit.tv xəbər verir ki, bu barədə "Yeni Klinika" məlumat yayıb.

Bildirilib ki, beşinci dərəcəli xroniki böyrək çatışmazlığı diaqnozu ilə müalicə alan 23 yaşlı Elvira Novruzovaya uğurla böyrək transplantasiyası əməliyyatı həyata keçirilib. Donor isə onun 45 yaşlı anası Gülşən Novruzova olub.

Məlumata görə, donor üzərində laparoskopik (qapalı) üsulla əməliyyat aparılıb. Böyrək transplantasiyasından sonra həm donorun, həm də pasiyentin vəziyyəti qənaətbəxş qiymətləndirilib.

Qeyd edək ki, Elvin Novruzov Vətən müharibəsində Qubadlının azadlığı uğrunda gedən döyüşlərdə qəhrəmancasına şəhid olub. O, Sumqayıt Şəhidlər xiyabanında dəfn edilib.

25-07-2026, 10:36 303