İndiyədək İpoteka və Kredit Zəmanət Fondu tərəfindən Mənzil İnşaatı Dövlət Agentliyinin (MİDA) 5 442 mənzilinin satışı üçün 275,8 milyon manat güzəştli ipoteka krediti ayrılıb.
Sumqayit.tv "Report"a istinadən xəbər verir ki, bunu Fondun Baş meneceri Rasim Abdullayev bildirib.
Onun sözlərinə görə, güzəştli ipoteka kreditləşməsi üçün hər il dövlət büdcəsindən 85 milyon manat vəsait ayrılır.
"Bu vəsaitlərin bir hissəsi Nazirlər Kabinetinin qərarı ilə təsdiqlənmiş bölgü əsasında istifadə edilir. Bildiyiniz kimi, MİDA mənzillərlə bağlı bir ay öncədən elan verir və bundan sonra satış həyata keçirilir", – deyə Rasim Abdullayev qeyd edib.
Baş menecer əlavə edib ki, MİDA mənzillərinə ayrılan kreditlərin sayı hər il bazara çıxarılan mənzillərin sayından asılı olaraq dəyişir.
Belə ki, ötən il MİDA mənzilləri üçün 379, ondan əvvəlki il isə 470 güzəştli ipoteka krediti ayrılıb.
Qeyd edək ki, güzəştli ipoteka kreditləri müəyyən edilmiş kateqoriyalara aid vətəndaşların daha əlverişli şərtlərlə mənzil sahibi olmasına imkan yaradır.
24-07-2026, 14:34
64
