Sumqayıt adambaşına düşən pərakəndə ticarət dövriyyəsinə görə Azərbaycanın ən yüksək göstəriciyə malik şəhərləri sırasında üçüncü yerdə qərarlaşıb.

Sumqayit.tv Modern.az-a istinadən xəbər verir ki, Dövlət Statistika Komitəsinin məlumatına əsasən, Sumqayıtda hər bir sakinə orta hesabla 5165,4 manat pərakəndə ticarət dövriyyəsi düşür.

Reytinqə 17 547,9 manat göstərici ilə Bakı şəhəri başçılıq edir. İkinci yerdə 5613,8 manat ilə Mingəçevir, üçüncü pillədə isə Sumqayıt qərarlaşıb.

İlk onluqda həmçinin Şirvan, Gəncə, Bərdə, Quba, Hacıqabul, Ağdaş və Şəki şəhər və rayonları yer alıb.

Qeyd edək ki, adambaşına düşən pərakəndə ticarət dövriyyəsi qiymətlərin səviyyəsini deyil, bir nəfərin il ərzində mağaza, market və digər pərakəndə ticarət obyektlərində orta hesabla nə qədər alış-veriş etdiyini göstərən iqtisadi göstəricidir. Bu göstərici əhalinin istehlak səviyyəsini əks etdirən əsas meyarlardan biri hesab olunur.

24-07-2026, 20:10 99