Sumqayıt Ağır Cinayətlər Məhkəməsinin hakimi Aynur Rzayevanın həlak olduğu avtomobil qəzası ilə bağlı məhkəmə prosesi başa çatıb.

Sumqayit.tv Xitab24.az-a istinadən xəbər verir ki, qəzanı törətməkdə təqsirləndirilən Nuran Abdurahmanov 5 il 2 ay müddətinə azadlıqdan məhrum edilib.

Məhkəmə prosesində Aynur Rzayevanın hüquqi varisi olan anası təqsirləndirilən şəxsi bağışlamayıb. O, qızının Sumqayıt Ağır Cinayətlər Məhkəməsinin hakimi olduğunu və ağır kateqoriyalı cinayət işlərinə baxdığını bildirərək hadisənin onun fəaliyyəti ilə əlaqəli ola bilməsi ehtimalının araşdırılmadığını qeyd edib.

Bundan başqa, hüquqi varis təqsirləndirilən şəxsdən 1 milyon manat təzminat tələb edib. Tələbin 30 min manatı avtomobilə dəyən ziyana, 700 min manatı mərhum hakimin övladlarının gələcək təminatına, 270 min manatı isə mənəvi zərərə görə olub.

Məhkəmə 700 min manatlıq maddi zərərin ödənilməsi ilə bağlı tələbi təmin etməyib. Mənəvi zərərə görə isə 20 min manat, avtomobilə dəymiş ziyana görə 1 701 manat təzminat müəyyənləşdirilib.

Beləliklə, təqsirləndirilən şəxs ümumilikdə 21 701 manat ödəməli olacaq.

Qeyd edək ki, hadisə ötən ilin dekabrında Sumqayıt–Pirşağı avtomobil yolunda baş verib. Nuran Abdurahmanovun idarə etdiyi "Samand Soren" markalı avtomobil hakim Aynur Rzayevanın sərnişin olduğu "Nissan Sunny" ilə toqquşub. Qəza nəticəsində hakim həyatını itirib, onun sürücüsü isə ağır yaralanıb.

Aynur Rzayeva şəhid övladı olub. Onun atası Tapdıq Rzayev Ermənistanın Azərbaycana qarşı təcavüzü zamanı Kərkicahanda şəhid olub.

25-07-2026, 14:47 162