Sumqayıt Dövlət Universitetinin rektoru Nurəli Yusifbəyli "SOCAR Karbamid" Zavodunda olub və müəssisənin direktoru Kutay Durna ilə görüş keçirib.
Sumqayit.tv xəbər verir ki, görüşdə universitetlə sənaye müəssisəsi arasında əməkdaşlığın inkişafı, qarşılıqlı təcrübə mübadiləsinin genişləndirilməsi və gələcək birgə layihələr müzakirə olunub.
Rektor Nurəli Yusifbəyli universitet-sənaye əməkdaşlığının ali təhsilin keyfiyyətinin artırılması və yüksəkixtisaslı mütəxəssislərin hazırlanmasında mühüm rol oynadığını bildirib. O, tələbələrin istehsalat mühitində praktiki bilik və bacarıqlar qazanmasının, startap təşəbbüslərinin dəstəklənməsinin və innovativ layihələrin hazırlanmasının əhəmiyyətini vurğulayıb.
"SOCAR Karbamid" Zavodunun direktoru Kutay Durna isə müəssisənin istehsalat və texnoloji imkanlarının tələbələrin peşə hazırlığının gücləndirilməsi və birgə layihələrin həyata keçirilməsi üçün geniş potensiala malik olduğunu qeyd edib.
Görüşdə tələbələrin istehsalat təcrübəsinin təşkili, əmək bazarının tələblərinə uyğun kadr hazırlığı, elmi-tədqiqat və innovasiya layihələrinin reallaşdırılması istiqamətində əməkdaşlığın gücləndirilməsi barədə fikir mübadiləsi aparılıb. Tərəflər bu məqsədlə çərçivə sənədinin imzalanması barədə razılığa gəliblər.
Bu gün, 11:22
9
