Sumqayıt şəhərində fəaliyyət göstərən "Nauka Tədris Mərkəzi" adlı özəl məktəbəqədər təhsil müəssisəsi ilə bağlı ciddi iddialar səsləndirilib.

Şikayətçi valideynin Sumqayit.tv-yə bildirdiyinə görə, övladları son 7 ay ərzində həmin bağçada təhsil alıb. Bu müddət ərzində müəssisə tərəfindən tələb olunan aylıq ödənişlər və müxtəlif adlar altında istənilən əlavə vəsaitlər tam şəkildə ödənilib.

Valideyn iddia edir ki, bu müddətdə övladları dəfələrlə kobud rəftara, psixoloji təzyiqə və fiziki zorakılığa məruz qalıblar. Onun sözlərinə görə, son hadisə zamanı övladlarından biri müəllim tərəfindən çubuqla vurulub.

Şikayətçinin iddiasına əsasən, bağçaya ümumilikdə 4 min manatdan artıq vəsait ödənilib. O bildirir ki, övladlarının avqust ayı üçün aylıq ödənişi əvvəlcədən edilsə də, uşaqları bağçadan çıxardıqlarına baxmayaraq həmin məbləğ geri qaytarılmayıb. Valideyn həmçinin uşağa məxsus bəzi şəxsi əşyaların da geri verilmədiyini iddia edir.

Valideynin sözlərinə görə, müəssisə övladını qəbul imtahanına tam şəkildə hazırlayacağını vəd edib. Lakin onun iddiasına əsasən, uşaq imtahandan uğur qazana bilməyib və valideyn bunu göstərilən təhsilin keyfiyyəti ilə əlaqələndirir.

Şikayətçi bildirir ki, baş verənlərlə bağlı bağçanın müdiri Pərvanə Vaqifovaya məlumat verilsə də, rəhbərlik məsələyə laqeyd yanaşıb və lazımi tədbirlər görülməyib.

Valideyn artıq məsələ ilə bağlı hüquq-mühafizə orqanlarına rəsmi müraciət etdiyini, hazırda araşdırma aparıldığını bildirib.

İddialara görə, hadisənin baş verdiyi "Nauka Tədris Mərkəzi" Sumqayıt şəhərinin 5-ci mikrorayonunda, "Müasir Stomatologiya" yaxınlığında yerləşir və iki korpusdan ibarətdir.

Şikayətçi müəllimlər İlhamə, Ayşən və Roya, eləcə də müəssisənin müdiri Pərvanə Vaqifovanın məsuliyyət daşıdıqlarını iddia edir.

Qeyd edək ki, bu yazıda yer alan məlumatlar şikayətçi valideynin iddialarına əsaslanır. Valideyn məsələ ilə bağlı hüquq-mühafizə orqanlarına rəsmi müraciət etdiyini və hazırda araşdırma aparıldığını bildirib.

Sumqayit.tv tərəfindən məsələ ilə bağlı "Nauka Tədris Mərkəzi"nin mövqeyini öyrənmək məqsədilə müəssisəyə rəsmi sorğu ünvanlanıb, həmçinin telefon əlaqəsi saxlanılıb. Lakin materialın hazırlandığı vaxtadək sorğuya hər hansı cavab təqdim edilməyib.

Qarşı tərəfin mövqeyini dərc etməyə hazırıq və təqdim ediləcəyi təqdirdə xəbərə əlavə olunacaq.

Müəllif: Elşən Yəhyayev

Bu gün, 21:03 51