Milli mətbuatın yaranmasının 150 illiyi münasibətilə bu gün Bakıda Four Seasons otelində təntənəli tədbir keçirilib.

Millət vəkili Səbinə Salmanovanın təşəbbüsü ilə Magen David Azərbaycan – İnsan Hüquqları Müdafiəsi və Xeyriyyə Cəmiyyəti tərəfindən təşkil olunan tədbirdə millət vəkilləri, media rəhbərləri, saytların baş redaktorları, jurnalistlər və ictimaiyyət nümayəndələri iştirak ediblər.

Tədbir şəhidlərimizin və Ümummilli Lider Heydər Əliyevin əziz xatirəsinin bir dəqiqəlik sükutla yad edilməsi və Dövlət Himninin səsləndirilməsi ilə başlayıb. 

Milli Məclisin deputatı, Azərbaycan–İsrail Parlamentlərarası işçi qrupunun rəhbəri, Magen David Azərbaycan Cəmiyyətinin fəxri sədri Anatoliy Rafailov çıxışında dövlətin mətbuatın inkişafına hər zaman xüsusi diqqət yetirdiyini bildirib. 

O qeyd edib ki, müasir Azərbaycan mediası operativliyi, dəqiqliyi və qərəzsizliyi ilə seçilir, dövlətçilik ənənələrinin möhkəmlənməsində mühüm rol oynayır. Rafailov media nümayəndələrinin peşəkarlığını, xüsusilə Vətən müharibəsi və pandemiya dövründə cəmiyyətin düzgün məlumatlandırılmasındakı əvəzsiz xidmətlərini yüksək qiymətləndirib.

Magen David Azərbaycan Cəmiyyətinin və Ümum İsrail Qafqaz Yəhudiləri Assosiasiyasının Azərbaycan nümayəndəliyinin sədri David Seliverstov çıxışında bildirib ki, “Əkinçi” ilə əsası qoyulan maarifçilik ideyaları bu gün də yaşayır. 

O vurğulayıb ki, müasir Azərbaycan mediası informasiya müharibəsində həqiqətlərin dünyaya çatdırılmasında mühüm rol oynayır və media nümayəndələrinin qərəzsiz, operativ fəaliyyəti ilə daim seçildiyini qeyd edib.

Tədbirdə millət vəkili Səbina Salmanova da çıxış edib. O, bildirib ki, bu gün burada Azərbaycan milli mətbuatının 150 illik yubileyini qeyd etmək üçün toplaşmışıq. Bu əlamətdar tarix təkcə medianın deyil, bütövlükdə cəmiyyətimizin tərəqqisi və ictimai düşüncənin inkişafı tarixidir:

"Hər birimizi bu əlamətdar gün münasibətilə ürəkdən təbrik edirəm! Azərbaycan mətbuatı “Əkinçi” qəzetindən başlayaraq indiyədək, mürəkkəb, çətin və şərəfli yol keçib. Mətbuatımız xalqımızın maariflənməsində, ana dilimizin və milli-mənəvi dəyərlərimizin qorunmasında, mədəniyyətimizin, incəsənətimizin təbliğində və inkişafında önəmli rol oynayır. Azərbaycanın müstəqillik dövrünün mətbuatı Ulu Öndər Heydər Əliyevin adı ilə sıx bağlıdır. Ümummilli Liderin 6 avqust 1998-ci il tarixli Fərmanı ilə kütləvi informasiya vasitələri üzərindən senzuranın götürülməsi jurnalistlərə fikirlərini azad və sərbəst ifadə etmək üçün geniş imkan yaratdı. 1999-cu ildə qəbul edilən “Kütləvi informasiya vasitələri haqqında” qanunla isə mətbu orqanın təsis edilməsi üçün dövlət orqanlarından icazə tələbi ləğv edildi”.

Millət vəkili daha sonra çıxışında bir məsələni xüsusi olaraq qeyd etmək istədiyini bildirib:

“Media mənə çox doğma sahədir. Bildiyiniz kimi, uzun illər Ədliyyə Nazirliyində çalışmışam. 2002-ci ilin mayın 11-də Ulu Öndər Heydər Əliyev “Kütləvi informasiya vasitələri haqqında" qanuna dəyişikliklər və əlavələr edilməsi barədə" qanunun tətbiq edilməsi haqqında Fərman imzalamışdı. Həmin Fərmanla KİV-lərin qeydiyyatı və hüquqi mexanizmlərin tənzimlənməsi Ədliyyə Nazirliyinə tapşırılmışdı. Bu prosesi isə Nazirlikdə çalışdığım və sonradan rəhbərlik etdiyim idarə icra edirdi. 2020-ci ilə kimi 5000-nə yaxın mətbu orqan qeydiyyata alınmışdı. Həmin vaxtda mətbuat nümayəndələri ilə görüşür, onlarla səmimi münasibətlər qururduq. Bu ünsiyyət zamanla sadəcə işgüzar əlaqə olaraq qalmadı, dostluğa və qarşılıqlı etimada çevrildi. Bu münasibətin isti nəfəsini bu gün də duyuruq. Buna görə də hər birinizə təşəkkür edirəm”.

S.Salmanova onu da bildirib ki, media nümayındələri həm Birinci, həm də İkinci Qarabağ müharibələrində üzərinizə düşən vəzifəni layiqincə yerinə yetirib, Azərbaycanın böyük Zəfərinin müjdəçisi olublar:
 
 “Hazırda dövlətimizin prioritet məsələlərindən biri də Qərbi Azərbaycanımıza qayıdışdır. Arzu edirəm ki, tez bir zamanda bu müjdəni xalqımıza, dünyaya çatdırasınız. Biz Prezident, Müzəffər Ali Baş Komandanımızın ətrafında sıx birləşərərək necə Qarabağımıza qayıtdıqsa, Qərbi Azərbaycanımıza da qayıdacağıq!”

Rəsmi hissədən sonra tədbir iştirakçıları üçün maraqlıbədii proqram təqdim olunub.