Lisey və gimnaziyalara qəbul üzrə qeydiyyat müddəti uzadılıb.

Sumqayit.tv xəbər verir ki, Azərbaycanın Təhsil İnstitutunun yaydığı məlumata görə, çoxsaylı müraciətlər nəzərə alınaraq qeydiyyat prosesi iyunun 21-i saat 15:00-dək davam edəcək.

Valideynlər və ya qanuni nümayəndələr qeydiyyatdan keçmək üçün şəxsi kabinetlərində “Sorğu yerləşdir” bölməsinə daxil olaraq əvvəlcə “Mərkəzi imtahanla qəbul” düyməsini seçməli, daha sonra isə imtahan mərkəzi və digər tələb olunan məlumatları qeyd etməlidirlər.

Qeyd edək ki, lisey və gimnaziyalara qəbul hər il tədris ili başlamazdan əvvəl “Şagirdlərin elektron yerdəyişməsi” sistemi vasitəsilə həyata keçirilir. İmtahanda iştirak hüququ qazanan şagirdlər tədris dili və riyazi təfəkkürü ölçən sualları cavablandırırlar. Müvafiq bal toplayan namizədlər növbəti seçim mərhələsinə buraxılır.

Mərkəzləşdirilmiş qaydada qəbul aparılan təhsil müəssisələri sırasında Sumqayıtda fəaliyyət göstərən aşağıdakı lisey və gimnaziyalar da yer alır:

• Nizami Gəncəvi adına texniki və təbiət elmləri liseyi;
• “Təfəkkür” liseyi;
• Təbiət elmləri təmayüllü gimnaziya;
• Humanitar və təbiət-riyaziyyat təmayüllü “İstedad” liseyi.

20-06-2026, 14:56 97