Süni intellekt vasitəsilə hazırlanan şəkillərlə məşhurlaşan Midjourney şirkəti bu dəfə tamamilə fərqli sahəyə daxil olaraq texnologiya dünyasında sensasiya yaradıb. İllərdir istifadəçilərin yaratdığı fantastik vizuallar, pişik şəkilləri və rəqəmsal sənət nümunələri ilə tanınan şirkət indi insan bədəninin daxili orqanlarını cəmi 60 saniyəyə görüntüləyə bilən cihaz təqdim edib.
Sumqayit.tv xəbər verir ki, Midjourney şirkətinin rəhbəri Devid Holts “Midjourney Medical” adlı yeni layihəni təqdim edərək şirkətin ilk tibbi cihazını nümayiş etdirib. “Midjourney Scanner” adlanan sistem tam bədən ultrasəs texnologiyası əsasında işləyir və şirkətin iddiasına görə, gələcəkdə MRT-yə alternativ ola bilər.
Təqdim olunan görüntülərdə insanın sümükləri, ağciyərləri, qaraciyəri, böyrəkləri və digər daxili orqanları üçölçülü formada əks olunub. Sistem istifadəçini xüsusi su vannasına endirir və minlərlə ultrasəs siqnalı vasitəsilə bədənin daxilinin xəritəsini çıxarır. Bütün proses təxminən bir dəqiqə çəkir.
Midjourney bildirir ki, cihazda 40-dan çox “Ultrasound-on-Chip” modulu istifadə olunur. Layihə ultrasəs texnologiyaları sahəsində tanınmış Butterfly Network şirkəti ilə əməkdaşlıq çərçivəsində hazırlanıb. Toplanan məlumatlar saniyələr ərzində yüksək hesablama gücünə malik serverlərdə emal edilərək üçölçülü təsvirə çevrilir.
Şirkətin planları bununla da bitmir. Midjourney 2027-ci ilin sonuna qədər San-Fransiskoda ilk “Midjourney Spa” mərkəzini açmağı planlaşdırır. Burada insanlar sauna, hovuz və digər sağlamlıq xidmətləri ilə yanaşı, tam bədən skanından da keçə biləcəklər. Şirkət uzunmüddətli perspektivdə dünyada 50 min belə cihaz quraşdırmaq və ayda 1 milyard skan həyata keçirmək niyyətində olduğunu açıqlayıb.
Lakin tibbi ekspertlər ehtiyatlı davranmağa çağırırlar. Radioloqlar bildirirlər ki, texnologiya maraqlı görünsə də, hazırda nə ABŞ Qida və Dərman Administrasiyasının (FDA) təsdiqini alıb, nə də diaqnostik vasitə kimi istifadəyə icazə verilib. Hazırda sistem yalnız bədən kompozisiyası və ümumi görüntüləmə məqsədləri üçün nəzərdə tutulur.
Maraqlıdır ki, Midjourney rəhbərliyi etiraf edir ki, yeni cihazın əsas hissəsi hələlik süni intellektdən deyil, ultrasəs və siqnal emalı texnologiyalarından istifadə edir. Bununla belə, şirkət gələcəkdə toplanacaq nəhəng məlumat bazasının süni intellekt sistemləri ilə işlənəcəyini və fərdi sağlamlıq xəritələrinin yaradılacağını bildirir.
Bir neçə il əvvəl internet istifadəçiləri üçün sadəcə şəkil yaradan platforma kimi görünən Midjourney-in indi tibbi görüntüləmə bazarına daxil olması texnologiya sektorunda ən gözlənilməz dönüşlərdən biri kimi qiymətləndirilir. Şirkətin iddialı planlarının reallığa çevrilib-çevrilməyəcəyini isə qarşıdakı illər göstərəcək. /Müsavat.com
Bu gün, 10:23
6
