Quba-Xaçmaz Regional Təhsil İdarəsinin sabiq müdiri Rüfət Hacıyev 8 il 6 ay müddətinə azadlıqdan məhrum edilib

Sumqayit.tv xəbər verir ki, Quba-Xaçmaz Regional Təhsil İdarəsinin sabiq müdiri Hacıyev Rüfət Malik oğlunun cinayət işi üzrə məhkəmə prosesi yekunlaşıb.

Sumqayıt Ağır Cinayətlər Məhkəməsində keçirilən iclasda hökm oxunub. Hökmə əsasən, Rüfət Hacıyev 8 il 6 ay müddətinə azadlıqdan məhrum edilib.

O, təhsil sahəsində vəzifə səlahiyyətlərindən sui-istifadə, rüşvət alma və qanunsuz yolla əldə etdiyi gəlirləri leqallaşdırmaqda təqsirli bilinib.

Baş Prokurorluğun yaydığı məlumata görə, Rüfət Hacıyev 2017–2023-cü illərdə rəhbərlik etdiyi təhsil qurumlarında — əvvəlcə Quba Rayon Təhsil Şöbəsində, daha sonra Quba-Xaçmaz Regional Təhsil İdarəsində — müxtəlif vəzifə təyinatları və yoxlamalardan azad edilmə müqabilində şəxslərdən ümumilikdə 65 min manatdan artıq məbləğdə pul vəsaiti alıb.

Bundan əlavə, o, 20 min manat məbləğində rüşvətin alınmasına vasitəçilik edib və qanunsuz yolla əldə etdiyi 175 min manatdan artıq vəsaiti yaxınlarının adına keçirməklə leqallaşdırıb.

Rüfət Hacıyevə qarşı Cinayət Məcəlləsinin 193-1.3.2, 308.2, 32.5, 308.2, 311.3.2 və 311.3.3-cü maddələri ilə ittiham irəli sürülüb və məhkəmənin qərarı ilə barəsində həbs qətimkan tədbiri seçilib.

Həmin iş üzrə digər təqsirləndirilən şəxs — Hesablama Palatasının sabiq əməkdaşı İntiqam Hacıyev isə ev dustaqlığında saxlanılır.