Bu ilin yanvar ayında hüquq-mühafizə orqanları tərəfindən narkomanlığa və narkotik vasitələrin qanunsuz dövriyyəsinə qarşı aparılan kompleks əməliyyat-axtarış tədbirləri nəticəsində ölkə üzrə ümumilikdə 793 cinayət faktı aşkar edilib.

Sumqayit.tv xəbər verir ki, bu barədə Report-a Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının daimi fəaliyyət göstərən İşçi Qrupundan məlumat verilib.

Aşkarlanan faktlardan 162-si narkotik vasitələrin qanunsuz satışı, 630-u qanunsuz əldə edilərək saxlanılması, 1-i isə digər kateqoriyalı cinayətlər olub. Görülən tədbirlər nəticəsində qanunsuz dövriyyədən 893 kq 456,646 qram narkotik vasitə və psixotrop maddə müsadirə edilib. Onların böyük hissəsini — 765 kq-dan çoxunu marixuana təşkil edib.

Məlumata görə, müsadirə olunan narkotiklərin ümumi dəyəri 22 milyon 795 min manat həcmində qiymətləndirilir.

Cinayət məsuliyyətinə 207 nəfər cəlb olunub. Onlardan 199-u kişi, 8-i qadındır. Həmçinin məsuliyyətə cəlb edilən 3 xarici ölkə vətəndaşından ümumilikdə 48 kq-dan artıq narkotik vasitə götürülüb.

Yanvar ayı ərzində narkotik vasitələrin qaçaqmalçılıq yolu ilə ölkəyə gətirilməsi ilə bağlı 18 fakt aşkarlanıb və bu hallar üzrə 252 kq-dan çox narkotik dövriyyədən çıxarılıb. Cinayətlərin 14-ü qrup halında, 100-ü isə əvvəllər məhkum olunmuş şəxslər tərəfindən törədilib.

Qeyd edək ki, metadonla əvəzedici müalicə proqramı çərçivəsində hazırda ölkə üzrə 3 mərkəzdə müalicə aparılır. Bu proqramdan Sumqayıt Narkoloji Mərkəzi də yararlanır və hazırda burada 122 nəfər müalicə alır.

Rəsmi statistikaya əsasən, narkomanlar arasında İİV-ə yeni yoluxma hallarında da azalma müşahidə olunur. Bu ilin yanvar ayının sonunadək aşkarlanmış yoluxma hallarında inyeksion narkotik istifadəçilərinin payı minimum səviyyədə qeydə alınıb.

Dünən, 15:06 7