Sumqayıt şəhərində müqəddəs Ramazan ayı münasibətilə iftar süfrəsi təşkil olunub. Tədbirdə Sumqayıt Şəhər İcra Hakimiyyətinin başçısı Zakir Fərəcov, millət vəkilləri, şəhid ailələrinin üzvləri, qazilər, hüquq-mühafizə orqanlarının rəhbərləri, din xadimləri və şəhər ictimaiyyətinin nümayəndələri iştirak ediblər.

İftar süfrəsindən əvvəl Azərbaycanın ərazi bütövlüyü və suverenliyi uğrunda canlarını fəda etmiş şəhidlərin xatirəsi ehtiramla yad edilib, onların ruhuna dualar oxunub.

Tədbirdə çıxış edənlər Azərbaycan Prezidenti İlham Əliyevin rəhbərliyi ilə 44 günlük Vətən müharibəsində qazanılmış qələbədən, ölkənin ərazi bütövlüyünün və suverenliyinin bərpasından, bu qələbənin əldə olunmasında şəhidlərin və qazilərin göstərdiyi qəhrəmanlıqdan danışıblar. Qeyd olunub ki, şəhid ailələrinə və müharibə iştirakçılarına göstərilən diqqət və qayğı dövlət siyasətinin əsas istiqamətlərindən biridir və bu sahədə müxtəlif sosial proqramlar həyata keçirilir.

Çıxışlarda ölkədə aparılan dövlət-din siyasətindən, milli-mənəvi dəyərlərin qorunması və tolerantlıq mühitinin möhkəmləndirilməsi istiqamətində görülən işlərdən də bəhs olunub. Bildirilib ki, Azərbaycanda müxtəlif dini konfessiyalar arasında qarşılıqlı hörmət və anlaşma mövcuddur və bu model beynəlxalq səviyyədə də yüksək qiymətləndirilir.

Vurğulanıb ki, insanları xeyirxahlığa, mərhəmətə, paylaşmağa və birlik ruhuna səsləyən müqəddəs Ramazan ayı İslam dünyası üçün xüsusi mənəvi əhəmiyyət daşıyır. İftar süfrələrinin təşkili isə cəmiyyətdə həmrəyliyin möhkəmlənməsinə, insanlar arasında birlik və qarşılıqlı dəstəyin güclənməsinə xidmət edir.

14-03-2026, 16:53 32