Sumqayıtın bağlar ərazisində, “Qurd dərəsi” adlanan yaşayış massivində internet problemi yaşanır.

Sakinlərin redaksiyamıza ünvanladığı şikayətlərə görə, artıq bir aya yaxındır ki, ərazidə internet xidməti qeyri-sabitdir. Bildirilir ki, abonentlər aylıq ödənişlərini vaxtında etsələr də, normal internet bağlantısından istifadə edə bilmirlər.

Şikayətlərdə qeyd olunur ki, “Aztelekom” MMC-nin Sumqayıt Telekommunikasiya qovşağının qaynar xəttinə dəfələrlə müraciət edilsə də, problem hələ də aradan qaldırılmayıb. Əraziyə texniki heyətin göndərildiyi bildirilsə də, internet qısa müddət sonra yenidən kəsilir.

Sakinlərin sözlərinə görə, təkrar müraciətlər zamanı onlara problemin həllinin əməkdaşların səlahiyyətində olmadığı bildirilib.

Bundan əlavə, iddialara görə, uzun müddət xidmətin göstərilməməsinə baxmayaraq, abonentlərə hər hansı kompensasiya da ödənilmir.

Qeyd edək ki, sözügedən ərazidə on mindən çox ailə yaşayır və hər biri aylıq internet xidmətinə görə ödəniş edir.

Mütəxəssislər problemin mümkün səbəbi kimi ərazidə quraşdırılmış internet paylayıcı avadanlıqların keyfiyyətsiz olmasını göstərirlər.

Məsələ ilə bağlı aidiyyəti qurumların mövqeyini dərc etməyə hazırıq.

Mənbə-Bizim.media

31-03-2026, 21:50 86