Türkiyə 2025-ci ilin fevral ayında 6 milyard 433 milyon kubmetr təbii qaz idxal edib.
Sumqayit.tv Eurostat-a istinadən xəbər verir ki, bu, ötən ilin fevralı ilə müqayisədə 20,5 faiz çoxdur. 2024-cü ilin fevralında ölkənin qaz idxalı illik ifadədə 12 faizə yaxın azalmaqla 5,337 milyard kubmetr təşkil etmişdi.

Fevralda idxal olunan qazın 3,063 milyard kubmetri maye qazdır. Bu, 2,355 milyon ton və əvvəlki illə müqayisədə təxminən iki dəfə çoxdur – ötən ilin fevralında göstərici 1,662 milyard kubmetr olub.
Beləliklə, Türkiyə Avropa ilə birlikdə qlobal LNG bazarında və onun üzərindəki qiymətlərdə artımın aparıcı qüvvələrindən birinə çevrilib. Fevral ayında Avropada maye qaz Asiyadan xeyli baha olub: spot bazarında orta qiymət yanvarda 512 dollardan sonra min kubmetr üçün təxminən 550 dollar təşkil edib.
Türkiyə artıq üçüncü aydır ki, ayda 2 milyon tondan çox LNG idxal edir. Hazırkı səviyyədə Türkiyənin LNG idxalı Hindistan kimi böyük bir bazarla müqayisə edilə bilər.

Türkiyənin LNG qəbul terminalları fevral ayında gücünün 90 faizi ilə işləyib. Ay ərzində ABŞ-dan 2,019 milyard kubmetr alınıb ki, bu da Amerika tədarükləri üçün yeni rekorddur. LNG tədarükünün qalan hissəsi Əlcəzair, Nigeriya, Trinidad və Tobaqo, Kamerun, Oman və Mozambik tərəfindən təmin edilib.
Maraqlıdır ki, fevralda Türkiyənin boru kəməri qazı idxalı illik ifadədə 8 faiz azalaraq 3,37 milyard kubmetr təşkil edib. Rusiyadan - “Qazprom”dan idxal 2,411 milyard kubmetr qəbul edilib ki, bu da illik ifadədə 9,3 faiz azalma deməkdir – ötən ilin fevralında göstərici 2,668 milyard kubmetrə bərabər olmuşdu. İrandan qaz tədarükü simvolik səviyyədə saxlanılıb - 83 milyon kubmetr(illik ifadədə 3 dəfəyə yaxın azalma). Azərbaycandan isə qaz idxalı 13 faizə yaxın artıb - 876 milyon kubmetr (776 milyon kubmetr).

Fevral ayında ölkə yeraltı anbarlardan təxminən bir milyard kubmetr qaz istehlak edib. Halbuki bir il əvvəl fevral ayında demək olar ki, anbarlara toxunulmamışdı. //Musavat.com