Qara dənizdə “ALTURA” adlı neft tankerinə pilotsuz uçuş aparatı ilə hücum edildiyi bildirilir.

Sumqayit.tv xəbər verir ki, hadisə İstanbul boğazının girişindən təxminən 15 mil məsafədə baş verib. İlkin məlumata görə, tankerə zərbə nəticəsində gəminin bəzi hissələrinə ziyan dəyib, lakin heyət üzvləri xəsarət almayıb.

Türkiyənin nəqliyyat və infrastruktur naziri Abdulkadir Uraloğlu bildirib ki, partlayış gəminin mühərrik bölməsində baş verib və hücumun dəniz dronu vasitəsilə həyata keçirildiyi ehtimal olunur.

Nazirin sözlərinə görə, Rusiyada xam neft yüklənmiş, xarici ölkə bayrağı altında üzən gəmidə türk heyət üzvlərinin olduğu müəyyən edilib.

Bildirilib ki, tankerdə 140 min ton neft olub və hücumun məqsədi gəmini tamamilə sıradan çıxarmaq olub.

Hadisə ilə bağlı araşdırma aparılır, yaxın saatlarda əlavə məlumat veriləcəyi gözlənilir.

26-03-2026, 12:33 31