Paytaxt ərazisində narkotiklərin qanunsuz dövriyyəsinə qarşı genişmiqyaslı əməliyyatlar keçirilib. Əməliyyatlar Nəsimi Rayon Polis İdarəsinin əməkdaşları tərəfindən həyata keçirilib.
Sumqayit.tv xəbər verir ki, Daxili İşlər Nazirliyinin mətbuat xidmətinin məlumatına görə, keçirilən tədbirlər zamanı narkokuryerlikdə şübhəli bilinən bir neçə şəxs saxlanılıb. Onlardan külli miqdarda – ümumilikdə 72 kiloqramdan artıq tiryək, marixuana, həşiş qətranı, eləcə də 200 ədəd metadon həbi aşkarlanaraq götürülüb.

Araşdırmalar zamanı müəyyən olunub ki, saxlanılan şəxslər narkotik vasitələri sosial şəbəkələr üzərindən tanış olduqları, şəxsiyyətləri istintaqla araşdırılan İran vətəndaşlarından əldə ediblər. Onlar bu maddələrin paytaxt ərazisində müxtəlif ünvanlara çatdırılmasını planlaşdırıblar.

Faktlarla bağlı cinayət işi başlanılıb və saxlanılan şəxslərin hər biri barəsində məhkəmənin qərarı ilə həbs qətimkan tədbiri seçilib.

Qeyd edək ki, bu ilin ilk üç ayı ərzində Nəsimi Rayon Polis İdarəsi tərəfindən ümumilikdə 156 kiloqram narkotik vasitə və psixotrop maddə, həmçinin 2 min ədəd metadon həbi qanunsuz dövriyyədən çıxarılıb.

9-04-2026, 09:47 191