Futbol eksperti və idman jurnalisti Anar Xanlarov, “Sumqayıt”ın son matçlarında hakimlərin buraxdığı səhvlərlə bağlı mövqeyini açıqlayıb. O, “Sumqayıt”–“Neftçi” oyununda Rəhim Həsənovun yaydığı bugünkü videodan sonra penalti epizodunun səhv qiymətləndirildiyini qeyd edib.
Sumqayit.tv xəbər veri ki, jurnalistin sözlərinə görə, bu, qış fasiləsindən sonra “Sumqayıt” klubunun əleyhinə ikinci ciddi hakim səhvidir. Xanlarov xatırladıb ki, “Araz Naxçıvan”la görüşdə hücumçu Murataya qarşı edilən kobudluq da penalti kimi dəyərləndirilməli idi. Daha sonra Rəhim Həsənov həmin epizodda referinin yanlış qərar verdiyini etiraf etmişdi.
Anar Xanlarov qeyd edir ki, komanda tənqid olunsa da, real mənzərə göstərir: uğursuz nəticələrdə yalnız komandanın oyunu deyil, hakim faktorunun da təsiri böyük olub.
Ekspert vurğulayıb:
“İki əsas rəqiblə oyunda eyni ssenari təkrar olunur. ‘Araz Naxçıvan’la oyunda haqlı penaltini vermirlər, ‘Neftçi’ ilə matçda isə hesab 0:0 olanda ‘Sumqayıt’ın qapısına əsassız penalti təyin edirlər. Bu cür qərarlar Avrokuboklara vəsiqə mübarizəsinə birbaşa təsir göstərir.”
Hazırda sosial şəbəkələrdə də həmin epizodlar geniş müzakirə olunur və AFFA Hakimlər Komitəsinin mövqeyi gözlənilir.

9-04-2026, 10:21 240