Sumqayit.tv xəbər verir ki, Sumqayıt Sənaye Parkında fəaliyyət göstərən “Nun” MMC tərəfindən laminatlı və polipropilen kisə istehsalı üzrə yeni müəssisə yaradılacaq.

Bu barədə Prezident İlham Əliyevin izi ilə Sumqayıt Sənaye Parkına təşkil olunan mediatur çərçivəsində “Nun” MMC-nin direktoru Ələsgər Mustafayev jurnalistlərə açıqlamasında məlumat verib.

Onun sözlərinə görə, ötən il parkın rezident statusunu alan şirkət tərəfindən həyata keçiriləcək layihə çərçivəsində bir hektar ərazidə istehsal müəssisəsinin inşası nəzərdə tutulur. Almaniya texnologiyası əsasında qurulacaq zavodun illik istehsal gücü 1 680 ton laminatlı kisə və 1 440 ton polipropilen kisə olmaqla, ümumilikdə 3 120 tondan çox olacaq. İstehsal ediləcək məhsullar əsasən daxili bazarın tələbatının ödənilməsinə yönəldiləcək.

Ə.Mustafayev bildirib ki, layihənin icrası nəticəsində 140 daimi iş yerinin yaradılması planlaşdırılır. İnvestisiya dəyəri 11,2 milyon manat olan müəssisənin qurulmasına İqtisadiyyat Nazirliyinin tabeliyində Azərbaycan Biznesinin İnkişafı Fondu tərəfindən 3 milyon manat məbləğində güzəştli kreditin ayrılması nəzərdə tutulub. Eyni zamanda, müəssisə üçün idxal ediləcək avadanlıqların ƏDV və gömrük rüsumlarından azad olunması planlaşdırılır.

Direktorun sözlərinə görə, müəssisədə istehsal olunacaq kisələr əsasən kənd təsərrüfatı, sənaye və tikinti sahələrində qablaşdırma məqsədilə istifadə ediləcək. İstehsal prosesində əsas xammal kimi “SOCAR Polymer” müəssisəsinin yerli polipropilen məhsullarından istifadə olunacaq ki, bu da yerli istehsalın dəstəklənməsinə və məhsul keyfiyyətinin yüksəldilməsinə xidmət edir.

Qeyd edək ki, Azərbaycan Prezidenti İlham Əliyev yanvarın 27-də Sumqayıt Sənaye Parkında “Nun” MMC-nin polipropilen və laminatlı kisə istehsalı müəssisəsinin təməlini qoyub.

Dünən, 14:27 7