Azərbaycan Prezidenti İlham Əliyevin Türkiyəyə rəsmi səfəri qardaş ölkənin “Haber Global” telekanalı tərəfindən geniş işıqlandırılıb.
Telekanalın Azərbaycan dövlət başçısının səfərilə bağlı hazırladığı silsilə süjetlərdə bildirilib ki, tarixi əhəmiyyət daşıyan yeddi fevral seçkisindən sonra İlham Əliyevin ilk xarici səfərini məhz Ankaraya etməsi ənənəvi və simvolik məna kəsb edir.

Qeyd olunub ki, Türkiyə ilə Azərbaycan arasında bir sıra önəmli mövzuların müzakirəsi davamlı şəkildə davam edir. Bu mövzular sırasına ikitərəfli münasibətlər başda olmaqla, Cənubi Qafqazdakı vəziyyət, eləcə də Yaxın Şərqdə cərəyan edən proseslər də daxildir.
Telekanalın videomateriallarında diqqətə çatdırılıb ki, Azərbaycan və Türkiyə arasındakı əlaqələr sanıldığından daha dərindir və möhkəm təməllər üzərində qurulub. Hazırda bir çox dünya dövlətləri bu qardaşlıq münasibətlərinə böyül qısqanclıqla yanaşsalar da, əlaqələrimizə xələl yetirməyə çalışsalar da, bütün bunlara rəğmən Bakı və Ankara işbirliyi getdikcə genişlənməkdə və güclənməkdədir.