Azərbaycan əleyhinə əsassız məlumatlar təqdim etməklə bilinən Qərb mərkəzli “Freedom House” təşkilatı 2024-cü il üçün hesabatında yenidən Bakını hədəf alıb. Lakin budəfəki hesabatda qeyd edilən göstəricilər Ermənistanda da ciddi müzakirələrə səbəb olub.
Belə ki, Ermənistanda 2018-c ildə baş vermiş “məxməri inqliab”dan sonra ilk dəfədir demokratikləşmə prosesində geriləmənin yaşandığı, tənəzzülün müşahidə olunduğu bildirilib. Lakin buna səbəb kimi Qarabağda antiterror əməliyyatlarının keçirilməsi göstərilib. Hətta Azərbaycan “etnik təmizləmə”də ittiham olunub, Bakının İrəvana demokratik geriləməyə səbəb olduğu qeyd edilib.
Həmçinin aprelin 5-də ABŞ, Aİ və Ermənistan rəsmiləri arasında keçirilən görüşdən sonra artıq Nikol Paşinyanın Qərb üçün əhəmiyyətini itirdiyinə dair Ermənistan KİV-də məlumatlar yayıldı. Hətta hakim “Mülkü müqavilə” fraksiyasının əksər üzvlərinin onun yerinə daha çox Qərbyönümlü, Aİ və ABŞ-ın tələblərini yerinə yetirəcək birini seçdikləri bildirilir. Hətta “Freedom House”nin son hesabatı Qərbin Paşinyandan üzv çevirməsi kimi dəyərləndirilir.
Maraqlıdır, iddia edildiyi kimi Qərbin 5 aprel görüşündən sonra ona qarşı fikirləri dəyişib? Erməniyönümlü və anti-Azərbaycan mövqeyi ilə tanınan təşkilatın son hesabatının məqsədi nədir?
Mövzunu Globalinfo.az-a şərh edən politoloq Elçin Abdullayev Qərb mərkəzli təsislərin Azərbaycana qarşı qərəzli mövqeyinin təəccüb doğurmadığını deyib:
“Əgər bu təşkilat özünü bu qədər demokratiyanın, insan hüquqlarının carçısı hesab edirsə, niyə 1990-cı illərdə erməni silahlı birləşmələri Qarabağda qətliamlar törədərkən, 1 milyona yaxın azərbaycanlını öz torpaqlarından didərgin salarkən səslərini çıxarmırdılar? Qərbin bir çox “demokratik” təsisatları hər zaman olduğu kimi 2024-cü ilin hesabatında da qərəzli mövqe nümayiş etdirdilər. Həmişə Ermənistanın müdafiəsi ilə məşğul olublar. Bu gün də həmin tendensiya davam edir. Bu səbəblə təşkilatın son hesabatında Azərbaycanla bağlı mövqeyi təəccüb doğurmur”.

Elçin Abdullayev
Politoloq Qərbin Paşinyandan imtina etməsi ilə bağlı səsləndirilən fikirlərin reallığa uyğun gəlmədiyini bildirib:
“Düşünürəm ki, hazırkı situasiyada Qərbin Nikol Paşinyandan imtina etmək kimi bir niyyəti yoxdur. Ona olan etimadın itirilməsi fikrini də həqiqətə uyğun hesab etmirəm. Hər kəsə məlumdur ki, Nikol Paşinyanı hakimiyyətə məhz Qərb dairələri gətirib. Onun bu vəzifəyə təyinatının səbəbi və məqsədi bəlli idi. Qərb dairələri bununla Rusiyanın Ermənistandakı dayaqlarını sarsıtmağı düşünürdülər. Buna da müəyyən qədər nail ola bildilər. Qərb dairələri Paşinyanın əli ilə Rusiyanın Ermənistandakı siyasi rıçaqlarını sıradan çıxarmağı bacardılar. Bu prosesi digər sahələr üzrə də davam etdirilər. Belə olan məqamda Qərbin indiki vəziyyətdə Paşinyandan imtina etməsi fikri inandırıcı görünmür”.
E.Abdullayev deyib ki, Qərbin Paşinyandan imtina etməsi yalnız iki halda mümkündür:
“Ümumiyyətlə Qərb dairələrinin Nikol Paşinayana etimadının yox olmasına dair məlumatları yayan Ermənistan KİV-lərinin arxasında böyük ehtimal Rusiya dayanır. Onlar erməni ictimaiyyətində Paşinyana qarşı Qərbdə ümidsizliyin olduğu fikrini formalaşdırmağa çalışırlar. Bununla xalqın Paşinyanın hakimiyyətdə qalmasına qarşı çıxmasını və ona olan inamın yox olmasını istəyirlər. Qərb və Rusiyanın Ermənistanda apardıqları mübarizə hələ yekunlaşmayıb. Bu səbəblə Qərbin baş nazirdən imtina edəcəyini düşünmürəm.
Qərb Paşinyandan yalnız iki halda imtina edə bilər. Birincisi, o zaman ki, Paşinyan üzərində qurulan plan tam olaraq başa çatdırılsın. Lakin indiki vəziyyətdə biz hələ bu layihənin yekunlaşmadığını görürük. İkincisi, əgər Nikol Paşinyanı başqa bir qərbmeyilli siyasətçi ilə əvəz etmək düşüncəsi varsa, o zaman ondan imtina edə bilərlər. Lakin indi Ermənistanda Paşinyanı əvəz edə biləcək ikinci bir şəxs yoxdur”.
Ayşən Mustafa
Globalinfo.az