Xəbər verdiyimiz kimi, minimum pensiyalar 280 manatdan 320 manata qalxıb (fevral ayından), bütün növ əmək pensiyaları isə 8,1% indeksasiya olunaraq artırılıb.

Pensiyalara tətbiq edilən 8,1 faizlik artımlar 1 yanvar tarixindən tətbiq ediləcək və yanvar ayının artımı da fevral pensiyasına əlavə edilərək ödəniləcək.

Bəs, pensiyalar artımlarla nə vaxt ödəniləcək?

Dövlət Sosial Müdafiə Fondunun ötən ilin oktyabrından Bakı, Sumqayıt şəhərləri və Abşeron rayonu üzrə pensiyaları ayın 8-15 tarixləri, rayonlar üzrə isə 20-28 tarixləri aralığında ödəyir.

Ötən ilin noyabr ayında pensiyalar Bakı, Sumqayıt və Abşeron rayonları üzrə 7 noyabrda, digər rayonlar üzrə isə 23 noyabrda ödənilib. Dekabrda müvafiq olaraq 10 və 24 dekabr tarixlərində, yanvarda isə 10 və 28 yanvar tarixlərində pensiyaların ödənilməsi həyata keçirilib.

Bu ay da Bakı, Sumqayıt şəhərləri və Abşeron rayonu üzrə pensiya ödənişinin 10 fevralda həyata keçiriləcəyi gözlənilir.

Qeyd edək ki, Dövlət Sosial Müdafiə Fondu bu ay pensiya ödənişinin tarixi ilə bağlı hələ açıqlama verməyib.