Son vaxtlarda Türkiyə-Azərbaycan münasibətlərində gərginlik və ya müəyyən soyuqluq yaşandığına dair iddialar tez-tez gündəmə gəlir. Buna səbəb kimi Azərbaycanın İsraillə yaxın əlaqələri və paralel olaraq Türkiyənin Ermənistanla sərhədi müvəqqəti də olsa açması göstərilir. İddia olunur ki, bu addımlar iki qardaş ölkə arasında strateji anlaşılmazlıq yaradıb.

Bununla belə, Prezident İlham Əliyevlə Rəcəb Tayyib Ərdoğanın Budapeştdə baş tutan son görüşü və oradakı səmimi görüntülər fərqli mənzərənin yaranmasına səbəb oldu.

Ankara ilə Bakı arasında münasibətlərin pozulması barədə səslənən fikirlər nə qədər əsaslıdır?

Globalinfo.az-a danışan politoloq Elçin Abdullayev bildirib ki, zaman-zaman Türkiyə və Azərbaycan arasında münasibətlərin soyuqlaşdığına dair iddialar irəli sürülür:

“Bu, normal haldır. Çünki iki ölkə arasındakı münasibətlərin yaxşı olması müəyyən dairələr tərəfindən xoş qarşılanmır. “Türkiyə və Azərbaycan münasibətləri soyuyub”, “bu dövlətlər bir-birinə qardaş deyillər” və s. kimi açıqlamalar həmin dairələrin şişirdilmiş yanaşmasının nəticəsidir. Əslində isə vəziyyət belə deyil.

Elçin Abdullayev

Azərbaycan və Türkiyə qardaş ölkələrdir. Bu münasibətlər yalnız sözlə deyil, əməldə də özünü göstərir. Siyasi və hərbi sahələrdəki əməkdaşlıq da bunun bariz nümunəsidir.

Azərbaycan və Türkiyə strateji tərəfdaşlardır. Onları bir-birinə bağlayan dərin strateji əlaqələr mövcuddur. İrəli sürülən iddialar Bakı–Ankara münasibətlərini pozacaq səviyyədə deyil. Bu cür fikirlərlə iki ölkə arasında münasibətləri sarsıtmaq mümkün deyil.

Siyasətdə bəzən fərqli addımlar atıla bilər. Məsələn, rəsmi Ankaranın hansısa bir addımı Bakının ürəyincə olmaya, yaxud əksinə ola bilər. Amma bu o demək deyil ki, iki ölkənin dərin əlaqələri həmin an pozulacaq, kölgə altında qalacaq”.