AZAL 20 noyabr tarixindən etibarən təyyarələrdə portativ şarj cihazlarının (“powerbank”) daşınması və istifadəsi ilə bağlı yeni qaydalar tətbiq edəcək.

Sumqayit.tv Modern.az-a istinadən xəbər verir ki, dəyişikliklər uçuşların təhlükəsizliyinin artırılması məqsədi daşıyır və beynəlxalq mülki aviasiya standartlarına tam uyğunlaşdırılıb.

Məlumata görə, artıq təyyarə salonunda smartfon və digər cihazları “powerbank” vasitəsilə doldurmaq qadağan olunur. Bu qərar litium-ion batareyaların yarada biləcəyi yanğın və qızma risklərinin qarşısını almağa hesablanıb.

Yeni qaydalara görə:

1. Təyyarə salonunda portativ şarj cihazından istifadə qadağandır;
2. “Powerbank”ı təyyarənin enerji şəbəkəsinə qoşmaq olmaz;
3. Cihazlar yuxarı baqaj rəflərində saxlanıla bilməz – sərnişinin yaxınlığında olmalıdır ki, ekipaj nasazlıq zamanı operativ müdaxilə edə bilsin;
4. Yalnız zavod markalaması olan, 100 vat/saatadək tutuma malik bir ədəd “powerbank” daşına bilər.

Tutumu 100–160 vat/saat olan portativ akkumulyatorlar yalnız aviaşirkətin əvvəlcədən verdiyi icazə ilə qəbul edilir. Bu kateqoriyaya daxil olan cihazların baqajda daşınması qəti qadağandır.

Sərnişinlərə xəbərdarlıq olunur ki, “powerbank”da həddindən artıq qızma, şişmə, deformasiyalar və ya kənar qoxu hiss etdikdə dərhal ekipaj üzvlərinə məlumat versinlər.

Qeyd edək ki, yeni qaydalar Bakıdan və Sumqayıt sakinlərinin sıx istifadə etdiyi bütün AZAL reyslərinə şamil olunur və 20 noyabr 2025-ci ildən qüvvəyə minir.

17-11-2025, 12:20 145