Azərbaycanın bölgələrində yeni 6 DOST Mərkəzinin tikintisi planlaşdırılır. Bu mərkəzlərdən biri də Sumqayıt şəhərində fəaliyyət göstərəcək.

Sumqayit.tv Reporta istinadən xəbər verir ki, hazırda Sumqayıt, Naxçıvan, Quba, Sabirabad, Gəncə və Masallıda DOST xidmətləri infrastrukturunun qurulması məqsədilə layihələndirmə, eləcə də təmir-tikinti işləri aparılır.

Bu barədə Əmək və Əhalinin Sosial Müdafiəsi Nazirliyinin tabeliyində fəaliyyət göstərən DOST Agentliyinin Müşahidə Şurasının növbəti iclasında məlumat verilib.

İclasda çıxış edən Müşahidə Şurasının sədri, əmək və əhalinin sosial müdafiəsi naziri Anar Əliyev bildirib ki, Prezident İlham Əliyevin Fərmanı ilə indiyədək Bakı şəhərində, Abşeron və Bərdə rayonlarında 7 DOST Mərkəzi, Zəngilanın Ağalı kəndində “Smart DOST” məntəqəsi, Qarabağ Regional DOST Mərkəzinin Şuşa filialı, eləcə də Kəlbəcər və Füzuli DOST məntəqələri istifadəyə verilib.

Qeyd olunub ki, Birinci vitse-prezident Mehriban Əliyevanın təşəbbüsü olan DOST konsepsiyası sosial xidmətlərin “bir pəncərə” prinsipi əsasında, müasir, çevik və tam şəffaf mexanizmlərlə vətəndaşlara təqdim edilməsinə imkan yaradır.

Məlumata görə, DOST mərkəzlərində indiyədək 4 milyondan çox vətəndaşa xidmət göstərilib, vətəndaş məmnunluğu səviyyəsi isə 98,7 faiz təşkil edir.

İclasda vurğulanıb ki, gələcəkdə Azərbaycanın bütün bölgələrinin, o cümlədən Sumqayıt şəhərinin DOST xidmətləri ilə tam əhatə olunması nəzərdə tutulur.

23-12-2025, 16:23 109