Mövzu ilə bağlı açıqlama verən psixoloq Sevinc Baxışova bildirir ki, son dövrlərdə oğlan uşaqlarının davranışlarında, təhsil prosesində və xüsusilə şagirdlərarası münasibətlərdə narahatlıq doğuran meyillər açıq şəkildə hiss olunur. Psixoloqun fikrincə, bu tendensiyaların əsas səbəblərindən biri hazırda ölkədə ümumi təhsil müəssisələrində çalışan kişi müəllimlərin sayının qadın müəllimlərlə müqayisədə xeyli az olmasıdır.

Sevinc Baxışova qeyd edir ki, uşaqlar məktəbəqədər təhsil pilləsindən başlayaraq ali məktəbə qədər əsasən qadın müəllimlərin, ailə daxilində isə anaların təsiri altında formalaşırlar. Bu vəziyyət xüsusilə oğlan uşaqlarının xarakterinin formalaşmasına təsirsiz ötüşmür. Onun sözlərinə görə, orta məktəblərdə kişi müəllimlərin azlığı şagirdlərin davranış modelinə, məsuliyyət anlayışına və sosial münasibətlərinə ciddi təsir göstərir.

Psixoloq vurğulayır ki, mövcud risk yalnız təhsilin keyfiyyəti və dərsə davamiyyətlə məhdudlaşmır, eyni zamanda uşağın şəxsiyyət və xarakter formalaşması ilə birbaşa əlaqəlidir. Müəllim təkcə bilik verən şəxs deyil, həm də uşağın həyat yoluna istiqamət verən, onun davranış və dünyagörüşünün formalaşmasında mühüm rol oynayan əsas fiqurdur.

Sevinc Baxışovanın sözlərinə görə, qadın müəllimlər şagirdlərə daha çox incəlik, qayğı və diqqət nümunəsi göstərdiyi halda, kişi müəllimlər yetkinlik, cəsarət və məsuliyyət hissini təcəssüm etdirir. Məhz bu iki yanaşmanın vəhdəti uşaqların hərtərəfli inkişafına şərait yaradır. Nəticədə şagirdlər hər iki cinsin güclü və zəif tərəflərini öyrənərək daha balanslı, sosial baxımdan yetkin və məsuliyyətli şəxsiyyət kimi formalaşırlar.