Martın 11-də Sumqayıt Dövlət Universitetinin kollektivi və bir qrup tələbə universitetin Mühəndislik fakültəsinin məzunu, şəhid Elnur Səmədovun doğum günü münasibətilə ailəsini ziyarət edib, məzarı önünə gül dəstələri qoyaraq xatirəsini ehtiramla yad ediblər.

Sumqayit.tv xəbər verir ki, ziyarətdə Sumqayıt Şəhər İcra Hakimiyyətinin Vətən müharibəsi iştirakçıları və şəhid ailələri ilə işin təşkili şöbəsinin müdiri Tərlan Hacızadə də iştirak edib.

Tədbir zamanı universitetin Sosial məsələlər və ictimaiyyətlə əlaqələr üzrə prorektoru Elmar Xəlilov şəhidin Vətən uğrunda göstərdiyi igidlikdən qürur duyduqlarını bildirib. Qeyd olunub ki, Elnur Səmədovun həyat yolu, vətənpərvərliyi və qəhrəmanlığı gənclər üçün örnəkdir.

Şəhidin ailə üzvləri göstərilən diqqətə görə minnətdarlıqlarını ifadə edərək, onunla daim fəxr etdiklərini bildiriblər.

Qeyd edək ki, baş kəşfiyyatçı leytenant Elnur Səmədov 2014-cü ilin döyüşlərində, 2016-cı ilin Aprel döyüşlərində və Vətən müharibəsində iştirak edib, 2022-ci ilin sentyabrında Kəlbəcər istiqamətində gedən döyüşlərdə şəhid olub. O, Prezident İlham Əliyevin sərəncamları ilə “Azərbaycan Bayrağı” ordeni və bir neçə medalla təltif edilib.

12-03-2026, 11:05 98