Sumqayıt şəhərinin Zeynalabdin Tağıyev yaşayış massivi, Kosmanaft ərazisi, Kərim Kərimli küçəsi, 40 nömrəli məktəbin yaxınlığında yol və ictimai nəqliyyatla bağlı ciddi problemlərin olduğu bildirilir.
Bu barədə Sumqayit.tv-yə müraciət edən sakinlərin sözlərinə görə, qeyd olunan ərazidə yolların vəziyyəti uzun müddətdir qənaətbəxş deyil. Bildirilir ki, xüsusilə 10V nömrəli marşrut avtobusunun hərəkət etdiyi istiqamətdə yolun nahamar olması səbəbindən, nəqliyyat vasitələrinin hərəkəti sözün həqiqi mənasında sərnişinlər üçün problrm yaradır.
Sakinlər qeyd edir ki, bu marşrutdan hər gün çox sayda insan – yaşlılar, tələbələr, uşaqlar və hamilə qadınlar istifadə edir. Yolun bərbad vəziyyətdə olması isə sərnişinlər üçün ciddi narahatlıq yaradır və bəzi hallarda sağlamlıq baxımından risklərə səbəb olur.
Eyni zamanda vurğulanır ki, sözügedən marşrut üzrə mərkəzə çatmaq təxminən 40-45 dəqiqə çəkir və bu müddət ərzində mövcud şəraitdə hərəkət etmək vətəndaşlar üçün əlavə çətinlik yaradır.
Məsələ ilə bağlı sakinlər aidiyyəti qurumlara müraciət edərək, həm yol infrastrukturunun bərpası, həm də 10V nömrəli marşrut avtobuslarının texniki vəziyyətinin yaxşılaşdırılması üçün tədbirlərin görülməsini xahiş edirlər.
Qeyd edək ki, məsələ ilə bağlı rəsmi qurumların mövqeyini öyrənməyə çalışacağıq.

18-03-2026, 21:10 50