Sumqayıt şəhərinin 7, 8 və 12-ci məhəllələrinin kəsişməsində bayram tonqalı yandırılarkən baş verən partlayışla bağlı Milli Məclisin deputatı Səbinə Salmanova açıqlama verib.

Sumqayit.tv xəbər verir ki, deputat bildirib ki, hadisə barədə məlumat alan kimi aidiyyəti qurumlarla əlaqə saxlanılıb və məsələ nəzarətə götürülüb. Verilən məlumata əsasən, zərərçəkənlərə vaxtında və zəruri tibbi yardım göstərilib, onlardan 9 nəfəri ambulator müalicə üçün evə buraxılıb.

Hazırda müalicəsi davam edən şəxslərdən biri Sumqayıt Tibb Mərkəzinin nəzdində fəaliyyət göstərən Uşaq Xəstəxanasında saxlanılır. 2013-cü il təvəllüdlü azyaşlının vəziyyətinin stabil olduğu və həkim nəzarətində olduğu bildirilib.

Digər zərərçəkən — 2014-cü il təvəllüdlü azyaşlı isə bilək və əlin termiki yanığı diaqnozu ilə daha ixtisaslı tibbi yardım alması üçün Nərimanov Tibb Mərkəzinin nəzdində fəaliyyət göstərən Yanıq Mərkəzinə təxliyə olunub. Onun vəziyyəti orta ağır kimi qiymətləndirilir.

Deputat operativ tədbirlərin görülməsinə görə Sumqayıt Tibb Mərkəzinin direktoru Elnur Azadxanova, zərərçəkənlərə tibbi yardım göstərən həkimlərə, həmçinin ictimaiyyətin məlumatlandırılmasına görə STM-in İctimaiyyətlə əlaqələr bölməsinin müdiri Ramil Zeynallıya təşəkkür edib.

S. Salmanova zərərçəkənlərə şəfa diləyərək, vətəndaşları bayram günlərində təhlükəsizlik qaydalarına ciddi əməl etməyə çağırıb.

22-03-2026, 19:40 135