Sumqayıt təhsilinin yaddaşında silinməz iz qoymuş dəyərli pedaqoqlardan biri də Əməkdar müəllimə Bəsirə Ağayeva idi. Uzun illər Təfəkkür liseyinə rəhbərlik edən bu ziyalı xanım təkcə direktor kimi deyil, həm də savadlı müəllim, yüksək mənəvi keyfiyyətlərə malik insan kimi hər kəsin hörmətini qazanmışdı. Onun adı Sumqayıt təhsilində peşəkarlıq, nizam-intizam və yüksək nəticələrlə assosiasiya olunurdu.

 
Bir vaxtlar Sumqayıtda bəzi məktəblər direktorların adı ilə tanınırdı və bu, təsadüfi deyildi. Həmin məktəblər “samballı məktəblər” kimi seçilir, uğurları ilə fərqlənirdi. Təfəkkür liseyi də məhz Bəsirə müəllimənin adı ilə nüfuz qazanmış, onun rəhbərliyi dövründə yüksək nəticələr əldə etmişdi. Bu təhsil ocağı təkcə bilik verən məkan deyil, həm də intizamın, mədəniyyətin və düzgün dəyərlərin formalaşdığı bir məktəb kimi tanınırdı.

 
Onun rəhbərliyi altında liseydə təhsilin keyfiyyəti daim diqqət mərkəzində olub. Müəllimlərin peşəkarlığının artırılması, şagirdlərin savadlı və vətənpərvər ruhda yetişməsi üçün xüsusi yanaşma tətbiq edilirdi. Məktəbdə müəllim-şagird münasibətləri qarşılıqlı hörmət və etimada əsaslanır, hər bir şagirdə fərdi yanaşma göstərilirdi. Bu da liseyin uğurlarını daha da möhkəmləndirirdi.

Bəsirə Ağayeva fərqli direktor idi — hər kəsə əl uzadan, kömək edən, insanlara dəyər verən bir rəhbər. Onun yaxşılığına toxunmayan insan demək olar ki, yox idi. O, mənə də hər zaman “qızım” deyə müraciət edirdi. Bu sadə, amma səmimi müraciət onun insanlara necə doğma münasibət bəslədiyini açıq şəkildə göstərirdi. Tələbkarlığı ilə yanaşı, qayğıkeşliyi və ədaləti onu daha da sevilən edirdi.

Onu tanıyanlar yaxşı bilir ki, Bəsirə müəllimə yalnız idarəçi deyildi — o, həm də müəllimlərin dostu, şagirdlərin dayağı, valideynlərin isə güvən yeri idi. O, hər bir problemin həllinə həssaslıqla yanaşar, insanları dinləməyi və onlara dəstək olmağı bacarardı. Bu xüsusiyyətlər onu təkcə peşəkar deyil, həm də böyük ürək sahibi bir insan kimi fərqləndirirdi.

Artıq 4 ildir ki, aramızda yoxdur, amma adı, əməyi və xatirəsi yaşayır. Onun yetişdirdiyi şagirdlər bu gün cəmiyyətin müxtəlif sahələrində uğurla fəaliyyət göstərir və müəllimələrinin adını layiqincə yaşadırlar. Bu isə bir müəllim üçün ən böyük mirasdır.

Belə insanlar unudulmur — onlar gördükləri işlərlə, yetişdirdikləri nəsillə, qoyduqları izlə daim xatırlanır. Bəsirə Ağayevanın həyatı və fəaliyyəti də bunun bariz nümunəsidir.

Ruhu şad olsun, xatirəsi daim qəlbimizdə yaşayacaq.

Müəllif: Cəmilə Fəyyaz

3-04-2026, 09:36 727