Xəbər verdiyimiz kimi, Prezident İlham Əliyevin sərəncamı ilə Cavid Vəliyev Beynəlxalq Münasibətlərin Təhlili Mərkəzinin İdarə Heyətinin üzvü təyin edilib.
Sumqayit.tv 1979-cu ildə Sumqayıtda anadan olan Cavid Vəliyev 1996-cı ildə şəhərin 31 nömrəli orta məktəbini bitirib. Daha sonra dövlət xətti ilə Türkiyənin Egey Universitetinin Jurnalistika fakültəsinə daxil olub. 2002-ci ildə buradakı təhsilini başa vuraraq, Qazi Universitetində Beynəlxalq Münasibətlər üzrə magistr dərəcəsi alıb. 2006-cı ildən Ankara Universitetində doktorantura təhsili alıb və müxtəlif beynəlxalq təqaüdlərə layiq görülüb.

O, 2005–2009-cu illərdə Türkiyənin Milli Təhlükəsizlik Strateji Araşdırma Mərkəzində elmi işçi, daha sonra Cənubi Qafqaz şöbəsinin müdiri kimi fəaliyyət göstərib. 2010-cu ildən Azərbaycan Respublikasının Prezidenti yanında Strateji Araşdırma Mərkəzində müxtəlif vəzifələrdə çalışıb. 2015-ci ildə Xarici siyasət məsələlərinin təhlili şöbəsinin müdiri, 2017-ci ildən isə ingilis dilində nəşr olunan Caucasus International jurnalının baş redaktoru olub. 2019-cu ildən Beynəlxalq Münasibətlərin Təhlili Mərkəzində Xarici siyasət şöbəsinin müdiri vəzifəsində çalışıb.

Beynəlxalq münasibətlər və təhlükəsizlik sahəsində aparıcı ekspertlərdən biri olan Cavid Vəliyev müxtəlif analitik məqalələrin müəllifidir. Onun araşdırmaları qlobal və regional siyasət məsələlərinə həsr olunub.