Xəbər verdiyimiz kimi, Estoniya, Latviya və Litva Rusiya və Belarusla sərhədlərin gücləndirilməsini nəzərdə tutan “Baltikyanı müdafiə xətti” layihəsi üzərində işləyir. Baltik ölkələri hesab edir ki, onlar üçün ən təhlükəli mərhələ Ukraynada atəşkəsin əldə olunmasından dərhal sonra başlayacaq. İddialara görə, bu halda Rusiya qısa zamanda yenidən silahlanaraq Baltikyanı ölkələri hədəf ala bilər.

Bəs Moskvanın belə bir hücum potensialı varmı? Ukrayna savaşından sonra yeni bir müharibənin başlama ehtimalı nə dərəcədə real görünür?

Globalinfo.az-a danışan politoloq Elçin Abdullayev deyib ki, Estoniya, Latviya və Litva kimi kiçik Baltik ölkələrinin belə bir qərar verməsi heç də təsadüfi deyil:

Elçin Abdullayeva

“Bu ölkələr NATO üzvüdür. Hər üçü tarixən Rusiya kimi böyük bir dövlətlə qonşu olublar. Bu da əsas verir ki, onlar hər zaman öz təhlükəsizliklərini ön planda tutsunlar. Ukraynadan sonra növbəti təcavüzə məruz qala biləcək dövlət olacaqlarını düşünən, bu qorxu ilə yaşayan da məhz Estoniya, Latviya və Litvadır. Kiyev və Moskva arasında sülh sazişinin imzalanacağı ilə bağlı məlumatlar dolaşsa da, fikrimcə, sülh sazişinin imzalanması Rusiyanın geri çəkilməsi kimi qiymətləndirilməməlidir. Ukrayna ilə gedən müharibə fonunda Rusiya böyük itkilər verdi, ciddi sanksiyalarla qarşılaşdı. Atəşkəsin əldə olunması Rusiyaya nəfəs almağa, ordusunu gücləndirməyə imkan verəcək”.

Politoloqun sözlərinə görə, gedən şiddətli müharibə fonunda Rusiya hazırda hərbi sənayesini gücləndirməyə nail olub:

“Hər bir halda Alyansın üzvü olan həmin üç ölkəyə Rusiyanın atəşkəs imzalandıqdan sonra belə hücum edəcəyi gözlənilmir. Bu addım Kremlə baha başa gələcək. Hazırkı geosiyasi reallıqları nəzərə alsaq, Rusiyanın Pribaltika ölkələrinə hücum etmə ehtimalı sıfıra bərabərdir”.

Safura Bənnayeva